Bakının Suraxanı rayonu, Əmircan qəsəbəsi, Cabir Əliyev küçəsi və ətraf ərazilərdə artıq on gündür içməli su yoxdur. Paytaxtın bir hissəsinin bu qədər müddət susuz qalması həm sağlamlıq baxımından, həm də sosial-iqtisadi cəhətdən ciddi narahatlıq doğurur.
Sakinlər bildirirlər ki, nə çimmək, nə tualet ehtiyaclarını qarşılamaq, nə də yemək bişirmək üçün su tapmaq mümkündür. Evlərdə vəziyyət tam antisanitariya şəraitindədir. Suyun olmaması ailələrin gündəlik həyatını iflic vəziyyətinə salıb.
Ərazidə məsul olan Suraxanı Su İdarəsi isə problemin həllində aciz görünür. İdarə əməkdaşları bildiriblər ki, hazırda nə qəsəbəyə veriləsi su var, nə də idarənin balansında su daşıyan maşın. Belə çıxır ki, su idarəsinin özünün suyu da, su daşıma imkanı da yoxdur.
İki gün əvvəl idarənin əməkdaşı Tehran adlı məsul şəxs sakinlərə bildirib ki, problemin həlli üçün Sabirabad rayonundan 18 tonluq su maşını gətizdirilib. Lakin bu, vəziyyəti düzəltmək əvəzinə daha da ağırlaşdırıb. Əhaliyə paylanan su bulanıq və içməli suya tamamilə yararsız olub. Tehran müəllimin izahatına görə, maşının içində əvvəllər Kür çayının suyu olub və sürücü üstünə içməli su dolduraraq paylayıb. Nəticədə, sakinlərə birbaşa Kür çayının bulanıq suyu təqdim edilib.
Ərazidə son vaxtlar çəkilmiş yeni su xətləri də mövcud problemi daha da dərinləşdirib. Sakinlərin dediyinə görə, xətlərə qoşulmuş sayğaclar həm xətdəki havanı, həm də suyu birlikdə ölçür və nəticədə insanlar istifadə etmədikləri suya görə ödəniş etməyə məcbur olurlar. Bu isə yalnız susuzluq deyil, həm də haqsızlıq hissini dərinləşdirir.
Ən acınacaqlısı isə odur ki, qəsəbənin daxilində “İcra Hakimiyyəti” yazılmış su maşınları ağaclara su verir, amma insanlar üçün bir damcı belə içməli su ayrılmır. Bu mənzərə haqlı olaraq sual doğurur: bu idarələr insanı, yoxsa ağacı yaşatmaqla məşğuldur?
Sakinlərin səsi aidiyyəti qurumlara çoxdan çatmalı idi. Onlar sual edirlər: Suraxanı Su İdarəsinin maşınları hara yoxa çıxıb? Paylanmış bulanıq suyun məsuliyyəti kimdədir? Yeni xətlərin texniki nasazlıqlarına görə kim cavab verir? Ən nəhayət, bu qədər gün su problemi yaşandığı halda, Suraxanı rayon İcra Hakimiyyəti və digər qurumlar nə ilə məşğuldur?
Əmircan sakinləri ölkə rəhbərliyinə və media qurumlarına müraciət edərək məsələnin ictimailəşdirilməsini və problemin operativ şəkildə həllini tələb edirlər. Onlar hesab edirlər ki, bu cür hallara görə məsuliyyət daşıyan şəxslər müəyyən olunmalı, cəzasızlıq mühiti aradan qaldırılmalıdır.
Bu, təkcə su problemi deyil, idarəetmədəki boşluqların və nəzarətsizliyin aydın göstəricisidir. Əgər paytaxtın bir qəsəbəsində günlərlə içməli su yoxdursa və sakinlərə Kür çayının bulanıq suyu təqdim edilirsə, bu, inkişafdan deyil, geriləmədən xəbər verir.
