Sabiq MTN şefinin yaxınları öz var-dövlətlərini qorumaq üçün indi də əcdadlarına şər atır…
Məlum olduğu kimi, sabiq MTN şefi Eldar Mahmudovun ailə üzvlərinə məxsus Britaniyadakı mülk və maliyyə vəsaiti ilə bağlı yeni qalmaqal meydana çıxıb. Britaniya hökumətinin apardığı araşdırma nəticəsində məlum olub ki, Britaniyalı hüquqşünas Rory Fordyce Azərbaycanın sabiq milli təhlükəsizlik naziri Eldar Mahmudovun ailəsi ilə bağlı vəsaitləri lazımi qaydada yoxlamayıb. Bu səbəbdən də Mahmudovlar ailəsinin vəkili 32,500 funt sterlinq (təxminən 42,000 ABŞ dolları) məbləğində cərimələnib. Bu qərar Birləşmiş Krallığın Vəkillərin İntizam Tribunalı (SDT) tərəfindən verilib.
İşin ən maraqlı tərəflərindən biri isə odur ki, Mahmudovların hüquqşünası bildirib ki, ailənin sərvəti 19-cu əsrdə yaşamış bir əcdaddan qaynaqlanır və bacı-qardaşın “aktivləri və biznes maraqları qanunvericiliyə və tənzimləyici tələblərə uyğun şəkildə qeydiyyatdan keçib və bəyan olunub.
Göründüyü kimi, Mahmudovlar malik olduqları 100 milyonluq imperiyanı ulu əcdadlarının sərvəti ilə əlaqələndirirlər. Onların sözlərinə inansaq, belə çıxır ki, Mahmudovlar XIX əsrdəki sərvətlərini üç əsrdir ki, tarixin və zamanın bütün təbəddülatlarından – hətta sovet dönəminin sərt müsadirələrindən belə nəinki uğurla qorumuş, həm də öz sərvətlərini daha da artıra, Avropanın bir neçə ölkəsində böyük mülklər əldə edə bilmişdir.
Təbii, Mahmudovlar tərəfindən irəli sürülən bu iddianın tamamilə absurd olduğu göz önündədir. Çünki nəinki Azərbaycanda, hətta bütün dünyada heç bir nəsil öz sərvətini üç əsr boyu qoruyub saxlaya bilməyib. Hər halda dünyada belə bir praktika mövcud deyil. Mahmudovların əcdadlarının həqiqətən də milyonçu olub-olmaması isə tam başqa bir məsələdir. Yəqin hər kəs razılaşar ki, Mahmudov MTN rəhbərliyində təmsil olunana qədər onun heç bir addımı – həyat tərzi, sahib olduğu mülklərin sayı və s. əcdadlarının var-dövlətindən xəbər vermirdi və çətin ki, sabiq nazirin yaxınları tərəfindən irəli sürülən bu iddianın həqiqətələ yaxından-uzaqdan əlaqəsi olsun.
Bir sözlə, Mahmudovların yaxınlarının verdiyi açıqlamadan belə məlum olur ki, sabiq nazir Avropadakı sərvətini qoruyub saxlamaq üçün indi də əcdadlarına şər atmaq qərarına gəlib və buna görə də “dünyanın ən uzun yalanı”na – 3 əsrlik yalan rekorduna imza atıb. Lakin Mahmudov və bu qəbildən olan şəxslər bilməlidir ki, Azərbaycan dövlətindən, Azərbaycan xalqından oğurlanan pullar gec-tez Azərbaycana qaytarılacaq və onlar yol verdikləri bütün qanunsuzluqlara görə cavab verəcəklər. Oğurladıqları sərvəti hansı adla pərdələməklərindən asılı olmayaraq…
