Avqustun 24-də Bakı şəhəri, Qaradağ rayonu ərazisində yerləşən ‘Sədərək’ ticarət mərkəzi tərəfindən icarəyə verilmiş anbarda baş vermiş yanğın bütün ölkədə, eləcə də mediada ciddi müzakirələrə səbəb olub. Artıq “Sədərək” ticarət mərkəzi tərəfindən icarəyə verilmiş obyektdə baş vermiş yanğınla əlaqədar FHN-in Əməliyyat-istintaq İdarəsində Cinayət Məcəlləsinin müvafiq maddəsi ilə cinayət işi başlanılıb və çox güman ki, yanğınla bağlı bütün təfərrüatlar istintaqın nəticəsində ortaya çıxacaq.
Indiki məqamda isə sual doğuran bir xeyli məsələ var ki, bunlardan da biri yanğının sürətlə yayılması və qısa zamanda əhəmiyyətli dərəcədə genişlənməsidir. Ehtimal ki, yanğının bunca sürətlə genişlənməsinin bir səbəbi “Sədərək “ticarət mərkəzində obyektlərin demək olar ki, bir-birinə bitişik şəkildə inşa edilməsi olub. Maraqlıdır, obyektlər həqiqətənmi tikinti və təhlükəsizlik qaydalarına zidd olaraq inşa edilib? Əgər doğrudan da belədirsə, o zaman əlaqədar qurumlar, eləcə də yanğının söndürülməsi ilə məşğul olan FHN-nin Tikintidə Təhlükəsizliyə Nəzarət Dövlət Agentliyi hara baxıb? Niyə obyektlərin inşası zamanı təhlükəsizlik normaları gözlənilməyib? Əgər gözlənilibsə, o zaman yanğının qısa zamanda bunca genişlənməsi necə baş verib?
Məlumat üçün qeyd edək ki, ölkə mediasında tez-tez FHN-nin Tikintidə Təhlükəsizliyə Nəzarət Dövlət Agentliyi ilə bağlı ciddi tənqidlər səslənməkdədir. “Sədərək” ticarət mərkəzində baş verən yanğının səbəblərinin obyektiv şəkildə araşdırılması bu tənqidlərin əsaslı ola biləcəyini isbatlaya bilər.
Məlumat üçün qeyd edək ki, “Sədərək” ticarət mərkəzi tərəfindən icarəyə verilmiş anbarda baş vermiş yanğın nəticəsində 13 nəfər tüstüdən zəhərlənib.
