Son günlər Heydər Əliyev Hava Limanı ərazisində taksi xidmətilə bağlı məhdudiyyətlərin tətbiq ediləcəyi, nəticədə bu istiqamətdə qiymətlərin bahalaşacağı barədə məlumatlar yayılır.
“AzPolitika” xəbər verir ki, bununla bağlı iqtisadçı Natiq Cəfərli maraqlı paylaşım edib:
“Azərbaycan Avropada taksi qiymətlərinə görə ən ucuz ölkələrdən biri idi. Taksi xidməti yeganə sahə idi ki, son 10 ildə qiymətlər xeyli ucuzlaşmışdı (son bir ilə qədər), devalvasiyalardan öncə daha baha olan taksidə gediş haqqı, 2015-dən, manat dəyərdən düşəndən sonra, əksinə, daha da ucuzlaşmışdı.
Düşünürəm ki, bütün iyrənc inhisarçılıq kimi, bu addım da çox bəsit “məntiqdən” doğub – hansısa məmurcuğun, hansısa ingilisdilli qaqulik balası düşünüb ki, niyə taksi xidməti azad, rəqabətli olmalıdır ki?! Özü-özünə deyib ki, gəl elə Hava Limanından şəhərə gəlişi alım inhisara, ancaq mənə hər gedişdən pay verən sürücülər işləsinlər, oturduğum yerdə günə 5-10 min manat qazanım da – elə deyil, “papulya”, yox e, sorry, “dad”?!
Bəli, dad, min dəfə dad belə məmurcuqlar əlindən, əllərinə səlahiyyət keçən kimi gözləri heç nə görmür…”
