Cəmi bir neçə gün əvvəl Rusiya Polşaya 20-dən artıq PUA ilə təxribat xarakterli hücum edəndə, Ukrayna Prezidenti daxil olmaqla, bir çoxları bu təxribatların ardının gələcəyini, özü də daha geniş formada gələcəyini dedilər. Lakin xüsusilə də ABŞ administrasiyası özünü bir növ “görməzliyə” vurdu. Rusiyaya gəlincə, Kreml saymazyana reaksiya və dolaşıq izahatlar verməklə, bir növ PUA-ların ona aid olduğunu heç birmənalı inkar da etmədi…
İndi isə həmin təxribatı “malalamağa” çalışan ABŞ Prezidenti Donald Tramp başda olmaqla, Qərb liderləri yeni reallıqla üz-üzə qalıb. Belə ki, dünən Rusiyanın 3 MiQ-31 hərbi təyyarəsi Estoniyanın hava məkanını pozaraq, Kremlin NATO-ya qarşı növbəti təxribatını törədib. Ölkənin hava məkanında 9 kilometrdən çox dərinliyə daxil olan qırıcılar 12 dəqiqə ərzində Estoniya üzərində uçublar.
Uçuşun Baltik dənizindəki Polşanın Petrobaltik neft platforması üzərindən həyata keçirildiyi xəbər verilir. Daha sonra NATO qırıcılarının havaya qaldırıldığı və Rusiya təyyarələrinin ölkənin səmasını tərk etdiyi qeyd edilir.
Beləliklə, ən pessimist və həm də realist proqnozlar özünü doğruldur. Rusiya Avropaya və NATO-ya qarşı ard-arda, özü də getdikcə daha təhlükəli təxribatlar törədir. Onun birliyini və dayanıqlılığını yoxlayır. NATO və onun başında duran ABŞ isə hələ ki, başını kola soxmuş dəvəquşu təsiri bağışlayır.
Polşaya qarşı hücumun “səhv olduğunu” deyən Tramp Estoniyanın hava məkanına müdaxilə barədə də buna bənzər ilikn reaksiya verib: “Bunun baş verməsi xoşuma gəlmir. Bu böyük problem ola bilər. Təxminən bir saatdan sonra mənə məlumat verəcəklər”.
Onun dediyi bir saatın üzərindən az qala bir sutka keçib. Ancaq heç bir ciddi reaksiya yoxdur. Rusiya isə Tramp başda olmaqla Qərbi ələ salaraq, hərbi təyyarələrin guya sadəcə, Kalininqrada uçduğunu və Estoniyanın hava məkanına girmədiyini bəyan edib.
Xatırladaq ki, Estoniyaya qarşı bu təcavüz aktının ərəfəsində Vladimir Putin ona “çox yaraşan” hərbi geyimdə Belarusa gələrək, şəxsən Rusiya-Belarus birgə hərbi təlimlərinə baş çəkib və bununla bir daha NATO-ya meydan oxuyub.
Bütün bunlar yenə 2014-cü ildə Krımın ilhaqı və Donbasa soxulmazdan öncə Rusiyanın Ukraynaya qarşı təxribatlarını xatırladır. O vaxt da Rusiya hər şeyi üzərindən atırdı. Eyni ssenari təkrarlanır. Həmin vaxt da bu təxribatlar Qərb tərəfindən “malalanırdı”. Ardınca Krım ilhaq olundu, sonra Donbasın böyük ərazisi işğal edildi, daha sonra da Ukraynaya qarşı genişmiqyaslı işğal başladı…
Məntiq və NATO konsepsiyası deyir ki, alyansın tamhüquqlu üzvü olan Estoniya hava məkanına təcavüz edən Rusiya təyyarələri dərhal vurulmalı idi. Necə ki, zamanında Türkiyə bunu etmişdi. Lakin bir daha göründüyü kimi, Qərb liderlərində Türkiyədəki cəsarət və istək yoxdur, heç yaxın zamanda olacağı da gözlənilmir…
Əlbəttə, Kremlin növbəti həyasızcasına gerçəkləşdirilən bu təxribatını cəbhədə heç bir ciddi dönüş və uğur qazana bilməyən Putinin “blefi” və NATO-nu parçalamağa, tərəddüd içərisində buraxmağa, Qərb liderlərini Ukarynaya Rusiyanın kapitulyasiya şərtlərilə barışması üçün təzyiq etməsinə hesablanan addım kimi görünə bilər. Lakin Putinin məqsədinin nə olmasından asılı olmayaraq, NATO “4-cü maddəni işə salmaq”-dan yəni, məsləhətməşələr aparmaqdan o yana keçmədikcə, Kremlin azğınlığı daha da artacaq. Qərb isə 3-cü Dünya Müharibəsi təhlükəsini bəhanə edərək, Kremlə tutarlı cavab vermədikcə, bu müharibəni daha da yaxınlaşdırmış olacaq…
C.Məmmədli
“AzPolitika.info”
