HƏMAS hərəkatı Amerika prezidentinin sülh planının şərtlərinə əməl etməsə, Donald Tramp İsrail Müdafiə Qüvvələrinin (İDF) Qəzza küçələrinə qayıtmasına icazə verəcək.
Musavat.com xəbər verir ki, bunu Tramp CNN-ə deyib. Amerika lideri telefonla verdiyi müsahibədə HƏMAS silahlarını yerə qoymaqdan imtina edərsə, nə baş verəcəyini soruşduqda “Mənim bir sözümlə İsrail o küçələrə qayıdacaq” deyib: “Əgər İsrail girib onları vura bilirsə, bu, ediləcək”.
ABŞ prezidenti bəyan edib ki, o, hazırda İsrail hakimiyyətini və hərbçilərini “cilovlamağa” məcburdur. İsrailin müdafiə naziri İsrael Katz isə bildirib ki, HƏMAS hərəkatı tərksilah etməkdən imtina edərsə, İsrail Qəzza zolağında hərbi əməliyyatları bərpa etmək niyyətindədir: “HƏMAS sülh sazişini yerinə yetirməkdən imtina edərsə, İsrail ABŞ-la koordinasiyada HƏMAS-ın tam məğlubiyyətinə nail olmaq, Qəzzada reallığı dəyişdirmək və müharibənin bütün məqsədlərinə nail olmaq üçün hərbi əməliyyatlara qayıdacaq”.
Bununla əlaqədar olaraq, Katz orduya Qəzzada döyüş zərurət yaranarsa, hərəkət üçün “hərtərəfli plan” hazırlamağı əmr edib.
