Dünya futbolunun ulduzu, Portuqaliya millisinin və “Əl-Nəsr” klubunun hücumçusu Kriştiano Ronaldonun Ağ Evdə prezident Donald Trampla görüşü son günlərin əsas gündəm mövzularından biri oldu. Bu da əsassız deyil. Bəlkə də bir ilk yaşanır ki, dünyanın əsas supergücünün rəhbəri bir futbolçunu prezident iqamətgahına dəvət edir, onu ən yüksək səviyyədə təqdim edir. Halbuki, o, hansısa bir ölkənin rəhbəri deyil, yaxud da siyasi tərəfdən təmsilçisi…
Tramp-Ronaldo görüşü ətrafında müdhiş bir iddia ortaya atılıb. Bəllidir ki, gələn ilin yayında Futbol üzrə Dünya Çempionatı keçirilən ölkələrdən biri də Amerikadır. İddia olunur ki, dünya kuboku Portuqaliyaya aparıla bilər. Bu şok iddia da təsadüfi deyil. Belə ki, düz üç il öncə Qətərdə baş tutan mötəbər turnirdə başqa bir ulduz futbolçu – Lionel Messi barədə kampaniya başladılmışdı. Onun yaşı nəzərə alınaraq və bir daha Dünya Çempionatında olmayacağı nəzərə alınaraq, ən çox bu fikirlərə rast gəlinirdi: “Dünyanın Messiyə dünya kuboku borcu var”.
Məhz həmin çempionatda ilk oyunda Səudiyyə yığmasına gözlənilməz məğlubiyyətə baxmayaraq, sonda Fransa ilə final oyununda gülən tərəf Messi və komandası olmuşdu. Həmin çempionatda Argentinanın lehinə bəzi hakim qərarlarına da azarkeşlər şahidlik etmişdilər…
Həmin vaxtı Ronaldo üçün də sonuncu Dünya Çempionatı olduğu deyilirdi. Amma kim bilərdi ki, bu futbol əfsanəsi 40 yaşında da yaşıl meydanlarda olacaq və DÇ-2026-da iştirakı əsas hədəf olaraq qarşısına qoyacaq.
İndi də belə iddialar səslənir ki, gələnilki yarışın qalibi Portuqaliya millisi olacaq. Ronaldonun ölkəsi üçün sonuncu xidməti kimi ilk dəfə dünya kubokunu Portuqaliyaya aparacağı qeyd olunur…
İdman mütəxəssisi Kənan Məstəliyev bu iddialarla razılaşmır. O, Musavat.com-a bunları deyib:
“Futbol domino deyil. Burada hansısa iddianı etməklə onu reallaşdırmaq arasında ciddi fərq var. Messi o kuboku haqqına qazanıb, böyük əmək sərf edib. Finalda Martines son dəqiqədə həmin qurtarışı etməsəydi, nə kubok olacaqdı, nə də qızıl medallar. Fərziyyələr, nəzəriyyələr irəli sürənləri daha ciddi düşünməyə dəvət edirəm. Dünya kubokunu kimsə kiməsə elə-belə verə bilməz. Bir nəfərin super oyunu ilə də bu iş həll olunmur. Kriştiano Ronaldo da dahi oyunçudur, böyük uğurlar qazanıb, daha böyüklərini də haqq edir. Amma o, Dünya Kubokunu istəyirsə, bunun üçün çalışmalı, Portuqaliya yığmasıyla birlikdə qələbə qazanmağa çalışmalıdır. Yarışda Almaniya, Fransa, İngiltərə, Braziliya və digər nəhənglər də var. Onları üstələmək asan olmayacaq”.
Cavanşir ABBASLI
Musavat.com
