ABŞ Prezidenti Donald Tramp ötən həftə Venesuela Prezidenti Nikolas Maduro ilə gizli telefon danışığı keçirib.
Bu barədə “The New York Times” nəşri məlumat yayıb.
Sözügedən xəbər iki lider arasında uzun müddətdir davam edən gərginlik fonunda böyük rezonans doğurub.
Xəbərə görə, telefon danışığında tərəflər mümkün bir görüş imkanını da müzakirə ediblər. Bununla belə, mənbələr hazırda belə bir görüşün planlaşdırılmadığını bildirir. Qeyd edilir ki, danışıqda ABŞ-nin dövlət katibi Marko Rubio da iştirak edib.
Bu telefon əlaqəsinin Tramp administrasiyasının Maduronu və onun ətrafında fəaliyyət göstərən “Cartel del los Soles” qruplaşmasını xarici terror təşkilatı kimi tanıyan qərarının qüvvəyə minməsindən qısa müddət əvvəl baş tutması da diqqət çəkir. Bu addım ABŞ-Venesuela münasibətlərində yeni bir gərginlik mərhələsi kimi qiymətləndirilirdi.
Qeyd edək ki, ABŞ-nin son dövrlərdə Venesuela ətrafında dəniz və hava məkanında böyük hərbi qüvvələr topladığı bildirilir. Rəsmi Vaşinqton bu fəaliyyətin narkotik qaçaqmalçılığına qarşı əməliyyat olduğunu iddia etsə də, mənbələrə görə, ABŞ administrasiyası lazım gəldiyi halda Maduronun hakimiyyətdən uzaqlaşdırılması üçün güc tətbiqinə də hazır ola bilər.
“AzPolitika.info”
