Üç qəsəbənin bir avtobus problemi: Bir marşrutun yoxluğu, on minlərlə insanı yolda qoyur
Bakının Türkan, Zirə və Pirallahı qəsəbələrinin bir qrup sakini uzun müddətdir əziyyət çəkdikləri nəqliyyat problemi ilə bağlı Vəhdət Partiyasına müraciət ediblər. Onların əsas narazılığı şəhərlə birbaşa əlaqəni təmin edən marşrut xəttinin ləğv edilməsi ilə bağlıdır. Sakinlər məsələnin ictimailəşdirilməsi və həllinə nail olunması üçün son ünvan kimi Vəhdət Partiyasını seçiblər.
Sakinlər bildirirlər ki, artıq neçə ildir bu qəsəbələrdən Koroğlu metro stansiyasına çatmaq üçün insanlar iki, bəzən isə üç nəqliyyat vasitəsi dəyişməli olurlar. Sərnişinlər əvvəlcə həmin qəsəbələrdən daxili marşrutlarla Qala Nəqliyyat Mübadilə Mərkəzinə gəlir, burada xətləri dəyişərək Koroğlu metro stansiyasına çatırlar. Bu isə əlavə vaxt itkisi və ciddi yorğunluq yaradır. Bəzi hallarda bu vəziyyət vətəndaşın maddi durumuna da mənfi təsir göstərir. İnsanlar ünvana daha tez və rahat çatmaq üçün məcbur qalaraq 1–2 manatlıq taksilərdən istifadə edirlər.
Sakinlər qeyd edirlər ki, illər əvvəl Türkan, Zirə və Pirallahı qəsəbələrindən birbaşa Koroğlu metro stansiyasına qədər fəaliyyət göstərən 86 və 101 saylı marşrutlar şəhərlə əlaqəni birbaşa təmin edirdi. Hazırda isə həmin marşrutlar ləğv edilərək birləşdirilib. Bu da nəqliyyat sisteminin yükünü azaltmaq əvəzinə, qəsəbə sakinlərinin problemini daha da dərinləşdirib.
Vəhdət Partiyası sakinlərin müraciətinin aidiyyəti qurum olan Azərbaycan Yerüstü Nəqliyyat Agentliyi (AYNA) tərəfindən diqqətlə araşdırılmasını və dövlətin prioritet istiqamətlərindən biri olan nəqliyyat problemlərinin həllinə daha həssas yanaşılmasını xahiş edir. Partiya xatırladır ki, bir neçə gün öncə Prezident İlham Əliyev yerli telekanallara verdiyi müsahibədə Bakının nəqliyyat problemlərinə xüsusi diqqət çəkib. Dövlət başçısı görülən və görüləcək işlər, qəbul edilən proqramlar və infrastrukturun genişləndirilməsi hesabına bu problemlərin mərhələli şəkildə həll olunacağını bildirib.
Vətəndaşlarla sıx əlaqədə olan, dövlət və cəmiyyət arasında körpü rolunu oynayan Vəhdət Partiyası qəsəbə sakinlərinin probleminin həllinə çağırır. Çünki qaldırılan məsələ sadə nəqliyyat problemi kimi görünsə də, əslində miqyası daha genişdir. Burada minlərlə insanın gündəlik olaraq ünvana çatmaq üçün üzləşdiyi çətinliklərdən söhbət gedir.
Belə ki, rəsmi mənbələrə əsasən, Türkan, Zirə və Pirallahı qəsəbələrində əhalinin sayı (qeydiyyatsız yaşayan şəxslərlə birlikdə) 60 minə yaxındır. Deməli, bu problem hər gün on minlərlə vətəndaşın həyatına birbaşa mənfi təsir göstərir. Mövcud vəziyyətdən ən çox xəstələr, yaşlı insanlar, uşaqlar və gündəlik şəhərə gedib-gələn işçilər əziyyət çəkirlər. Xəstəxanaya, poliklinikaya və təcili tibbi yardıma vaxtında çatmaq bəzən ciddi problemə çevrilir. Bir marşrutla rahat gedilə biləcək yol indi çoxmərhələli, çətin və yorucu bir prosesə dönüb. Bu isə ictimai nəqliyyata olan inamı zəiflədir.
Vəhdət Partiyası vurğulayır ki, istənilən sahədə, o cümlədən nəqliyyat sahəsində atılan addımlar və tətbiq edilən yeniliklər insanlara əziyyət deyil, rahatlıq gətirməlidir. Əgər həyata keçirilən islahatlar minlərlə insanın narazılığına səbəb olursa, bu məsələyə ciddi yanaşılmalı və problemin aradan qaldırılması üçün real addımlar atılmalıdır. Vəhdət Partiyası aidiyyəti qurumların məsələyə diqqətlə yanaşacağına və problemin tezliklə həllini tapacağına inanır. Əks təqdirdə, Vəhdət Partiyası məsələnin daha yüksək instansiyalar qarşısında qaldırılması istiqamətində fəaliyyət göstərəcək.
