Vəhdət Partiyasının üzvləri Milli Qəhrəman Mübariz İbrahimovun heykəli önünə gül dəstələri qoyaraq onun əziz xatirəsini ehtiramla yad ediblər.
Azərbaycan Dövlət Neft və Sənaye Universitetində yerləşən heykəlin önündə çıxış edən Vəhdət Partiyasının təşkilati işlər üzrə şöbə müdiri Zahir İbrahimli Milli Qəhrəman Mübariz İbrahimovun şərəfli ömür və döyüş yolundan danışıb.
O bildirib ki, Mübariz İbrahimovun qəhrəmanlığı Azərbaycan Ordusunun qüdrətini dünyaya nümayiş etdirən mühüm tarixi hadisələrdən biri kimi yadda qalıb, göstərdiyi misilsiz igidlik isə Azərbaycan gəncliyi üçün əbədi örnəkdir.
Zahir İbrahimlinin sözlərinə görə, Mübariz İbrahimov kimi igidlərin göstərdiyi şücaət və vətənpərvərlik ruhu Müzəffər Ali Baş Komandanın rəhbərliyi altında Ordumuzun əldə etdiyi böyük Qələbənin mənəvi əsasını təşkil edib.
“Müharibə Veteranları və Beynəlmiləlçi Hərbçilər” İctimai Birliyinin sədri Əzizağa Qənizadə də Milli Qəhrəman Mübariz İbrahimovun şərəfli döyüş yolundan söz açaraq onun əziz xatirəsinin ürəklərdə daim yaşayacağını bildirib.
O qeyd edib ki, ADNSU ərazisində ucaldılan bu abidə də rəhbərlik etdiyi ictimai birlik tərəfindən icra olunan layihə çərçivəsində hazırlanaraq ictimaiyyətə təqdim edilib.
Çıxış edənlər qəhrəmanın Vətənə sədaqətindən, yüksək vətənpərvərlik ruhundan bəhs edərək, Mübariz İbrahimovun xatirəsinin xalqımızın qəlbində daim yaşayacağını və onun qəhrəmanlığının gələcək nəsillərə nümunə olacağını vurğulayıblar.
Sonda tədbir iştirakçıları Milli Qəhrəmanın heykəli önünə gül dəstələri düzərək onun müqəddəs xatirəsinə dərin ehtiramlarını bildiriblər.
