NATO Baş katibi Mark Rutte aprelin 21-22-də Türkiyənin paytaxtı Ankaraya rəsmi səfər edəcək. Bu səfər çərçivəsində Rutte bir sıra yüksək səviyyəli görüşlər keçirəcək və Türkiyənin müdafiə sənayesi obyektlərini ziyarət edəcək.
Səfər proqramına əsasən, Baş katib Rutte Türkiyə Prezidenti Rəcəb Tayyib Ərdoğan, Xarici İşlər naziri Hakan Fidan və Milli Müdafiə naziri Yaşar Gülər ilə bir araya gələcək. Bu görüşlərdə NATO-nun gündəmindəki əsas məsələlər, regional təhlükəsizlik və ikitərəfli müdafiə əməkdaşlığı müzakirə olunacaq.
Mark Ruttenin müdafiə sənayesi obyektlərinə səfəri Türkiyənin bu sahədə əldə etdiyi nailiyyətləri yerində görmək və gələcək əməkdaşlıq imkanlarını dəyərləndirmək baxımından böyük əhəmiyyət kəsb edir. Türkiyə son illərdə müdafiə sənayesində ciddi irəliləyişlər əldə edərək NATO daxilindəki rolunu gücləndirib.
Antalya Diplomatiya Forumundan sonra baş tutan bu səfərdə Türkiyənin Alyansdakı artan rolu və müdafiə əməkdaşlığının genişləndirilməsi xüsusi diqqət mərkəzində olacaq. Görüşlərdə həmçinin NATO-nun şərq cinahının gücləndirilməsi və Ukraynadakı vəziyyət kimi aktual mövzulara da toxunulacağı gözlənilir.
