28 aprel 2026-cı il tarixdə Qazax Rayon Mərkəzi Xəstəxanası PHŞ-də 2026-cı il “Şəhərsalma və Memarlıq İli” çərçivəsində görkəmli oftalmoloq-alim, akademik Zərifə xanım Əliyevanın anadan olmasının 103-cü ildönümünə həsr olunmuş “İki Dahi İnsan ömrü” mövzusunda tədbir keçirilib.
Tədbir Qazax Rayon İcra Hakimiyyəti, Yeni Azərbaycan Partiyası Qazax Rayon Təşkilatı və Qazax Rayon Mərkəzi Xəstəxanası PHŞ-in birgə təşkilatçılığı ilə baş tutub.
Tədbir Qazax RMX PHŞ-in binası qarşısında inşa edilmiş Vətən müharibəsi şəhidi tibb xidməti leytenantı Adil Əfəndiyevin xatirə bulağının ziyarəti ilə başlayıb. Adil Əfəndiyevin xatirəsi anılıb
və ehtiram əlaməti olaraq bulağın önünə tər qərənfilər düzüblər.
Daha sonra tədbir iştirakçıları xəstəxanada təşkil olunmuş Ulu Öndər Heydər Əliyevin və akademik Zərifə xanım Əliyevanın həyat və fəaliyyətinə həsr edilmiş kitab, jurnal və fotolardan ibarət sərgiyə baxış keçiriblər.
Tədbiri Qazax Rayon Mərkəzi Xəstəxanasının direktoru Afiq Fərruxov açıb. O, tədbir haqqında məlumat verərək iştirakçıları təqdim edib.
Sonra Azərbaycan Respublikasının Dövlət Himni səsləndirilib. Ümummilli Lider Heydər Əliyevin, akademik Zərifə xanım Əliyevanın və torpaqlarımızın ərazi bütövlüyü uğrunda canlarından keçmiş bütün şəhidlərin əziz xatirəsi bir dəqiqəlik sükutla yad edilib.
Tədbir iştirakçıları akademik Zərifə xanım Əliyevanın şərəfli həyat və fəaliyyətini əks etdirən filmə baxıblar.
Tədbirdə giriş nitqi ilə çıxış edən Qazax Rayon İcra Hakimiyyətinin başçısı Rəcəb Babaşov bildirib ki, Zərifə xanım Əliyeva Azərbaycan oftalmologiya elminin inkişafında müstəsna xidmətlər göstərib: “Zərifə xanım təkcə böyük alim deyildi. O, həm də Ümummilli Lider Heydər Əliyevin vəfalı ömür-gün yoldaşı, fədakar ana, yüksək mənəviyyat sahibi idi. Ulu Öndər deyirdi: “Zərifə xanım tibb elminə hədsiz bağlı, çox xeyirxah insan idi”. Bu gün onun yolunu Möhtərəm Prezidentimiz cənab İlham Əliyevin rəhbərliyi ilə uğurla davam etdiririk”.
Çıxışlarda Zərifə xanım məktəbindən danışılıb
Tədbirdə YAP Qazax rayon təşkilatının sədri Anar Nəbiyev, Qazax Rayon Mərkəzi Xəstəxanasının direktoru Afiq Fərruxov, təqaüddə olan həkim Sevda Məmmədova, Poliklinika şöbəsinin müdiri Raqiyya İsmayılova, Qazax RMX PHŞ-da YAP Ərazi partiya təşkilatının sədr əvəzi Cavahir Əhmədova, həkim-nefroloq, səhiyyə işçiləri həmkarlar ittifaqı şurasının sədri Cahanə Xasməmmədova, Təcili Tibbi Yardım şöbəsinin müdiri Nəzrin Əliyeva çıxış ediblər.
Çıxışlarda qeyd olunub ki, Zərifə xanım Əliyevanın 1947-ci ildə Tibb İnstitutunu bitirdikdən sonra respublikanın rayonlarını gəzərək traxoma xəstəliyinə qarşı apardığı mübarizə, 14 monoqrafiyası, 150-dən artıq elmi məqaləsi Azərbaycan səhiyyəsinin qızıl fonduna daxildir. Onun “Xəstəyə öz doğman kimi yanaş” prinsipi bu gün də Qazax həkimlərinin əsas şüarıdır.
Həmçinin vurğulanıb ki, 2026-cı il “Şəhərsalma və Memarlıq İli” çərçivəsində təkcə şəhərlər, binalar deyil, eyni zamanda mənəvi dəyərlərimiz də yenidən qurulur və möhkəmlənir. Möhtərəm Prezident İlham Əliyevin səhiyyəyə göstərdiyi diqqət nəticəsində Qazax Rayon Mərkəzi Xəstəxanasında da müasir şərait yaradılıb, yeni şöbələr açılıb, icbari tibbi sığorta uğurla tətbiq edilir.
Tədbirin sonunda şair, partiya veteranı Cavanşir Rüstəmov tibb işçilərinə həsr etdiyi şeirini səsləndirib.
