Bu gün Azərbaycanın internet media məkanında uğurla fəaliyyət göstərən www.patriot.az xəbər saytının 15 illik yubileyi qeyd olunur.
2011-ci ildən tanınmış jurnalist Arif Yusifovun rəhbərliyi ilə fəaliyyət göstərən “Patriot.az” xəbər saytı yarandığı gündən etibarən cəmiyyətin operativ, dəqiq və obyektiv informasiya ilə təmin olunmasını əsas fəaliyyət prinsipi kimi müəyyənləşdirib. Saytın yaradılmasında başlıca məqsəd ölkəmizdə və dünyada baş verən ən mühüm ictimai-siyasi, iqtisadi, sosial, mədəni və digər əhəmiyyətli hadisələri müasir informasiya texnologiyalarının imkanlarından istifadə etməklə geniş oxucu auditoriyasına operativ şəkildə çatdırmaq olub.
Peşəkar jurnalistika prinsiplərinə sadiq qalaraq həyata keçirilən düzgün informasiya siyasəti, obyektiv xəbərçilik ənənəsi və daim yenilənən məzmun sayəsində “Patriot.az” qısa müddətdə Azərbaycanın internet media məkanında özünəməxsus yer qazanıb. Bu gün sayt geniş oxucu auditoriyasına malik, etibarlı və operativ xəbər resurslarından biri kimi fəaliyyətini uğurla davam etdirir.
“Patriot.az” günün 24 saatı ərzində ölkədə və dünyada baş verən ən aktual hadisələri izləyərək operativ xəbərlər, analitik yazılar, reportajlar, foto və videomateriallar hazırlayır. Eyni zamanda dövlət əhəmiyyətli tədbirlər, ölkəmizin sosial-iqtisadi inkişafı istiqamətində həyata keçirilən layihələr, ictimai həyatda baş verən mühüm yeniliklər və digər vacib mövzular barədə mütəmadi olaraq oxucularını dolğun informasiya ilə təmin edir.
Milli maraqları, peşəkarlığı və operativliyi fəaliyyətinin əsas istiqamətlərindən biri hesab edən “Patriot.az” ötən 15 il ərzində informasiya məkanında etibarlı media qurumu kimi öz nüfuzunu qoruyub saxlayıb və Azərbaycan jurnalistikasının inkişafına dəyərli töhfələr verməyə davam edib.
15 illik yubileyi münasibətilə “Patriot.az” xəbər saytının təsisçisi və baş redaktoru Arif Yusifovu, peşəkar jurnalistlərdən ibarət kollektivini və çoxsaylı oxucularını səmimi qəlbdən təbrik edir, media fəaliyyətində yeni-yeni uğurlar, tükənməz yaradıcılıq enerjisi, möhkəm cansağlığı və gələcək fəaliyyətlərində daha böyük nailiyyətlər arzulayırıq. İnanırıq ki, “Patriot.az” bundan sonra da operativ, obyektiv və peşəkar informasiya missiyasını uğurla davam etdirərək Azərbaycan mediasının inkişafına mühüm töhfələr verməyə davam edəcək.
