Biz mina təhlükəsi ilə bağlı ümumi narahatlığı paylaşan tərəfdaşlarımıza və Azərbaycanın humanitar mina təmizləmə işlərinə verdikləri töhfəyə görə minnətdarıq. Lakin göstərilən yardım bu problemin miqyasını nəzərə aldıqda kifayət deyil.
Cumhuriyyet.az Teleqraf-a istinadla xəbər verir ki, bunu Azərbaycanın xarici işlər naziri Ceyhun Bayramov bildirib.
Onun sözlərinə görə, Azərbaycanda mina təmizləmə işlərinin 90%-dən çoxu milli resurslar hesabına maliyyələşdirilir ki, bu da problemin miqyası baxımından kifayət deyil.
“Azərbaycan üçün bu insan tərəfindən törədilmiş fəlakətin gətirdiyi əzablar keçmişdə qalmayıb – o, bu gün də aktual bir məsələdir. Mina partlayışları insan həyatına son qoymağa və bərpa proseslərini ləngitməyə davam edir. Buna görə də, insan həmrəyliyi naminə, Azərbaycanda mina təmizləmə fəaliyyətlərini daha da gücləndirmək və genişləndirmək üçün beynəlxalq dəstəyi artırmaq vacibdir”, – nazir vurğulayıb.
XİN başçısı qeyd edib ki, minalardan əziyyət çəkən bir ölkə kimi Azərbaycan, humanitar mina təmizlənməsində beynəlxalq əməkdaşlığın mühüm əhəmiyyətini birbaşa anlayır: “Azərbaycan öz minalanmış ərazilərinin təmizlənməsi ilə yanaşı, qlobal humanitar mina təmizləmə səylərinə də əhəmiyyətli töhfə verir. Belə ki, Azərbaycan Türkiyə, Gürcüstan, Əfqanıstan və Ukraynada mina təmizləmə layihələrinə dəstək göstərib.
Münaqişənin başa çatmasından sonra, Azərbaycan üç beynəlxalq mina konfransı təşkil edib və bu tədbirlər mina təmizləmə üzrə ekspertlər, müdafiəçilər və praktikləri bir araya gətirib. Bu cür konfranslar mina təhlükəsinə dair dialoqu təşviq etmək, təcrübə mübadiləsi aparmaq və mina ilə bağlı problemləri gündəmə gətirmək baxımından xüsusi əhəmiyyət daşıyır”.
C.Bayramov diqqətə çatdırıb ki, minaların yaratdığı faciəvi təcrübə Azərbaycanın bu sahədə beynəlxalq əməkdaşlığa aktiv töhfə verməsinə səbəb olub: “Biz inanırıq ki, birgə səylərlə insan həyatını xilas edə bilərik və gələcək nəsillər üçün daha təhlükəsiz və firavan bir dünya qura bilərik”.
