Azərbaycan Yazıçılar Birliyini öz diktator prinsiplərilə 40 ilə yaxındır ki, idarə edən (əslində isə əsarətində saxlayan!) və bu minvalla rəhbəri olduğu qurumda bütün ədəbi deyərləri deqradasiyaya uğradan Anarın səriştəsiz idarəçiliyi (həm də!) Çingiz Abdullayevlərin himayədarlığı sayəsində bugünə gəlib çıxıb…
Məhz bu baxımdan da Yazıçılar Birliyinin rəhbərliyində (Anarın diktatorluğunun tərkib hissəsi olaraq) qeyri-qanuni şəkildə (bəli, qeyri-qanuni şəkildə!) illərdir ki, təmsil olunan şəxslərdən biri də Çingiz Abdullayevdir…
Bu yerdə istərdim fikirlərimi daha da əhatəli ifadə edim.
Demək, Azərbaycan Yazıçılar Birliyi yarandığı gündən üzü bəri adıçəkilən qurumun on üç qurultayı keçirilib. Bunlardan səkkizi sovet dövrünə, biri müstəqillik ərəfəsinə, son dördü isə müstəqillik dövrünə təsadüf edib. Bu öz yerində…
Ancaq hal-hazırda əlimdə olan faktlara və ictimaiyyətə təqdim edilən AYB nizamnaməsinə əsasən deyə bilərəm ki, müstəqillik dönəmində Yazıçılar Birliyinin rəhbərliyi keçirilən qurultaylarda dəfələrlə nizamnamə qaydalarını açıq-aşkar tərzdə pozub. O qayda pozuntularından biri də Çingiz Abdullayevin kürsü sevdasının üzərindədir.
Belə ki, Azərbaycan Yazıçılar Birliyinin Nizamnaməsinin “Rəhbər orqanlar və onların səlahiyyətləri” bölməsində yazılır:
“Azərbaycan yazıçılarının qurultayı açıq səsvermə ilə və səs çoxluğu ilə Azərbaycan Yazıçılar Birliyinin sədrini, sədrin təqdimatı ilə birinci katib və katiblərini (beş il olmaqla iki müddətdən artıq seçilə bilməz) seçir”.
Məhz bu nizamnamə qaydalarına baxmayaraq Çingiz Abdullayev 1991-ci ildən (Anarın diktatorluğunun fonunda) AYB-nin katibidir.
Göründüyü kimi Çingiz Abdullayevin bu şəkildə bir neçə qurultay “adlaması” açıq-aydın nizamnamə qaydalarına ziddir. Bu ziddiyətin yaranmasının isə başlıca səbəbkarı heç şübhəsiz ki, (az öncə də qeyd etdim) Anar və onun səriştəsiz idarəçiliyidir.
Amma ziddiyətlər bununla da bitmir… Hələ burada digər bir pozuntu da müxtəlif zamanlarda katiblərin qurultayda seçki yolu ilə seçilməsi yox(!), birbaşa Anar tərəfindən təyin edilməsidir.
… Bir sözlə, Yazıçılar Birliyi Çingiz Abdullayevlərin “işğalından” can qurtarmaq üçün Anar idarəçiliyinin əsarətindən xilas olunmalıdır.
Emil Rasimoğlu
şair-publisist, Azərbaycan Yazıçılar Birliyinin üzvü
