ABŞ Dövlət katibi Marko Rubio BMT Baş Assambleyası çərçivəsində Rusiya Xarici İşlər naziri Sergey Lavrovla görüşüb.
“AzPolitika” xarici KİV-ə istinadla xəbər verir ki, görüşdə Amerika Prezidenti Donald Trampın Moskvanı zorakılığı dayandırmağa və Rusiya-Ukrayna müharibəsinin başa çatdırılması üçün konkret addımlar atmağa çağırışı bir daha səsləndirilib.
Dövlət Departamentinin mətbuat xidmətinin rəhbər müavini Tommi Pigottun açıqlamasında qeyd olunub:
“Dövlət katibi Prezident Trampın qan tökülməsinə son qoymaq və Moskvanın uzunmüddətli sülhə yönəlmiş ciddi addımlar atmasının vacibliyi barədə çağırışını xatırladıb”.
Məlumata görə, ABŞ və Rusiya nümayəndə heyətlərinin qapalı danışıqları 50 dəqiqə davam edib. Görüşdən sonra Lavrov jurnalistlərin suallarına cavab verməyib, yalnız barmağını yuxarı qaldıraraq “baş barmaq” jesti göstərib.
Rusiya XİN isə rəsmi açıqlamasında bildirib ki, Lavrov danışıqlarda Vaşinqtonla “Ukrayna böhranının əsas səbəblərinin aradan qaldırılması istiqamətində əməkdaşlığa hazır olduqlarını” vurğulayıb və “Kiyev və bəzi Avropa paytaxtlarının münaqişəni uzatmağa hesablanmış sxemlərinin qəbuledilməz olduğunu” qeyd edib.
Qeyd edək ki, daha əvvəl BMT Baş Assambleyasında çıxışı zamanı Donald Tramp münaqişənin həlli istiqamətində ciddi iş apardığını bildirib. O, Rusiya ilə yaxşı münasibətlərinin sülh prosesinə yardım göstərə biləcəyini vurğulayıb. Tramp deyib:
“Hamı düşünürdü ki, Rusiya bu müharibəni üç günə udacaq. Bunun qısa toqquşma olacağı güman edilirdi. Ancaq tamamilə fərqli oldu. Bu isə Rusiyanı pis vəziyyətə salır”.
