Hurriyyet.az xəbər verir ki, Özbəkistan prezidenti Şavkat Mirziyoyev dövlət orqanlarında idarəetmə aparatının genişmiqyaslı optimallaşdırılması haqqında fərman imzalayıb. Rəqəmsal texnologiyaların və süni intellektin tətbiqi nəticəsində 2000 nəfərdən artıq məmur işdən çıxarılacaq.
Sənədə əsasən, 2025-ci il noyabrın 1-dən kütləvi ixtisarlara başlanılacaq. Əsas məqsəd icra hakimiyyəti orqanlarında proseslərin avtomatlaşdırılması və rəqəmsallaşdırılması yolu ilə kadrların azaldılmasıdır.
Ən çox ixtisara məruz qalan Vergilər Komitəsi olacaq – komitənin 486 işçisi işdən çıxarılacaq. Sonrakı yerlərdə Su Təsərrüfatı Nazirliyi (224 əməkdaş), Kənd Təsərrüfatı Nazirliyi (218), Ədliyyə Nazirliyi (197), Ekologiya Nazirliyi (176) və Əmək Nazirliyi (163) gəlir.
Dövlət qurumlarının rəhbərlərinə mərkəzi aparatın və tabeliyində olan strukturların ştat cədvəlinin optimallaşdırılması üçün bir həftə müddətində xüsusi komissiyalar yaratmaq tapşırılıb.
Onlardan, həmçinin ləğv ediləcək vəzifələrin siyahısını təsdiq etmələri və ixtisarların əmək qanunvericiliyinə ciddi riayət olunmaqla həyata keçirilməsini təmin etmələri tələb olunur.
Məşğulluq və Yoxsulluğun Azaldılması Nazirliyinə Həmkarlar İttifaqları Federasiyası ilə birlikdə ixtisarlardan zərər çəkmiş bütün işçilərin işlə təmin olunmasına köməklik göstərmək tapşırılıb.
