Azərbaycanda dövlət idarəçiliyində şəffaflığın artırılması və səmərəliliyin yüksəldilməsi istiqamətində aparılan islahatlar çərçivəsində daha bir mühüm addım atılıb. Uzun müddətdir cəmiyyətdə narazılığa səbəb olan qohumçuluq və nepostizm hallarına qarşı mübarizə daha da gücləndirilir.
Məlumata görə, ölkənin vacib dövlət qurumlarından birində kök salmış “qohum şəbəkəsi”nin təmizlənməsinə başlanılıb. Bu şəbəkənin qurumun fəaliyyətinə ciddi maneələr törətdiyi, vəzifə səlahiyyətlərindən sui-istifadə hallarına yol açdığı və ümumi işin keyfiyyətinə mənfi təsir etdiyi qeyd olunur.
Qohumçuluq əsasında vəzifəyə gətirilən şəxslərin əksəriyyətinin peşəkar bilik və bacarıqlara malik olmaması, lakin yüksək postları tutması qurum daxilində narazılığa və işçilər arasında ədalətsizlik hissinə səbəb olurdu. Bu cür hallar kadr siyasətinin düzgün qurulmasına mane olur, dövlət maraqlarına zidd fəaliyyətlərə şərait yaradırdı.
Artıq bu “şəbəkə”nin üzvlərinin, o cümlədən yeznə, əmisi oğlu, xalası oğlu kimi yaxın qohumluq əlaqələri olan şəxslərin vəzifələrindən azad edilməsi prosesinə start verilib. Mənbələr tərəfindən bəzi vəzifədən azad edilən şəxslərin adları da açıqlanıb ki, bu da islahatların qətiyyətli xarakterindən xəbər verir.
Dövlət başçısının tapşırığı ilə həyata keçirilən bu islahatlar dövlət idarəçiliyində ləyaqət və peşəkarlıq prinsiplərini önə çıxarmağı hədəfləyir. Məqsəd, dövlət qurumlarının şəxsi maraqlara deyil, yalnız xalqın və dövlətin maraqlarına xidmət etməsini təmin etməkdir.
Bu addımlar qurumun fəaliyyətində şəffaflığı artıracaq, səmərəliliyi yüksəldəcək və ən əsası, cəmiyyətdə dövlətə olan etibarı daha da möhkəmləndirəcək. Gözlənilir ki, oxşar təmizləmə əməliyyatları digər dövlət qurumlarında da aparılacaq.
