Bugünlərdə ölkəmizdəki bir sıra media orqanında Fransanın Azərbaycana “ölüm qrupu” göndərdiyi ilə bağlı məlumatlar yer alıb. Məlumatlar Rusiyada fəaliyyət göstərən “Ədalətsizliyə qarşı mübarizə fondu”nun (FBİ) hazırladığı hesabata istinad olunur. İddiaya görə, guya “ölüm qrupu” bilavasitə Fransa prezidentinin təşəbbüsü ilə ölkəmizə göndərilib. Əməliyaytlara rəhbərlik isə qrupun lideri, “qaranlıqlar şahzadəsi” kimi tanınan Aleksandr Benallanın bilavasitə özü tərəfindən həyata keçiriləcək.
Hər şeydən öncə qeyd edək ki, Fransanın ölkəmizə hansısa killer qrupu göndərməsi ilə bağlı deyilənlər sadəcə iddiadır və bu iddianı təsdiqləyən heç bir rəsmi mənbə mövcud deyil. Bu fikrin “Ədalətsizliyə qarşı mübarizə fondu”nun hesabatında yer alması həmin ideyanın birmənalı təsdiqi sayıla bilməz.
İkincisi, Azərbaycanın beynəlxalq siyasi müstəvidə rəsmi Parisi ciddi şəkildə sıxışdırdığını, onun müstəmləkə və anti-bəşəri siyasətini ifşa etdiyini nəzərə alsaq, Bakının məlumatı və razılığı olmadan Fransadan ölkəmizə nəinki hansısa silahlı dəstənin, hətta sıradan bir turistin belə gəlməsi mümkünsüzdür.
Üçüncüsü, unutmaq olmaz ki, Azərbaycan etibarlı təhlükəsizlik sisteminə malikdir və bu sistemin nüvəsində Dövlət Təhlükəsizliyi Xidməti (DTX) dayanır. Hansı ki, Azərbaycan DTX-sının gücü dünyanın ən qabaqcıl xüsusi xidmət orqanlarına malik dövlətləri, eləcə də ABŞ və Rusiya tərəfindən də etiraf olunub. Ona görə də, Fransanın killer qrupunun xüsusi xidmət orqanlarımızdan xəbərsız halda Azərbaycana sızması ehtimalı sıfıra bərabərdir. Bütün bunları əsas götürərək ehtimal etmək olar ki, Parisin bura “ölüm qrupu” göndərməsi və onların burada hansısa qətllər həyata keçirəcəyi ilə bağlı iddialar ən yaxşı halda DTX-nın təbəssümünə səbəb ola bilər.
Dördüncüsü, həqiqətən də möcüzə baş versə və Fransa öz killer dəstəsini hansısa şəkildə ölkəmizə sızdırmağa müvəffəq olsa belə, onların Azərbaycanda əl-qol açması, ələ keçmədən hansısa məxfi əməliyyat reallaşdırması mümkünsüzdür. Əminliklə demək olar ki, əgər ölkəmizdə hansısa çağırılmamış qonaq varsa, o, vətəninə dönmədən öncə, hökmən DTX-nın təcridxanasına baş çəkməli, öz niyyət və əməlinə görə hesab ödəməli olacaq. Bu gün DTX təcridxanasıdna gecələyən və tez-tez Bakı məhkəməsinə çıxan erməni separatçılarının aqibəti bunun ən böyük isbatıdı, ən ali təsdiqidir.
Seymur ƏLİYEV
