Millət vəkili Vüqar Bayramov 3 uşaqlı analara erkən pensiya hüququnun verilməsini təklif edib. O, uşaq sayına görə qadınların pensiya yaşının azaldılmasının sosial təminatı gücləndirəcəyini bildirib.
Qeyd edək ki, hazırda qadınların pensiya yaşı 64-dür və bir ildən sonra isə 65 olacaq.
Cumhuriyyet.az xəbər verir ki, təklifə münasibət bildirən tanınmış iqtisadçı-ekspert Razi Abbasbəyli ajans.az-a söyləyib ki, 2019-cu ilin statistik məlumatına əsasən, Azərbaycanda 256 261 üçuşaqlı ailə var:
’Bu, əvvəlki illə müqayisədə yarım faiz azalma deməkdir. Pandemiyadan sonra isə bu sahədə rəsmi statistik məlumatlar açıqlanmayıb. Orta hesabla götürdükdə, hazırda ölkədə təxminən 300 min ailənin 3 uşağı var. Fikrimizcə, bu rəqəm o qədər də yüksək deyil. Əgər üçuşaqlı analara erkən pensiya hüququ verilməsi təklifi reallaşsa, bu, dövlət büdcəsi üçün təxminən 25 faiz əlavə xərc demək olar”.
Ekspert vurğulayıb ki, Dövlət Sosial Müdafiə Fondunun açıqladığı məlumatlara əsasən, 2024-cü ildə fondun gəlirlərində artım müşahidə olunub:
” Gözlənilir ki, 2025-ci ildə də əlavə 10 faiz artım baş versin. Belə olan halda, üçuşaqlı anaların vaxtından əvvəl pensiyaya çıxması və ümumilikdə çoxuşaqlı ailələrin müəyyən imtiyazlarla təmin olunması mümkün görünür.
Bu istiqamətdə artıq müvafiq təkliflər də irəli sürülüb və məsələ hazırda dövlət qurumları səviyyəsində müzakirə olunur. Hesab edirəm ki, üçuşaqlı analara müəyyən güzəştlərin verilməsi sosial ədalətin təmin olunması baxımından düzgün addım olardı’’.
