Ukrayna Prezidenti Volodimir Zelenski hesab edir ki, Rusiya genişmiqyaslı səfərbərliyə getsə, Vladimir Putin ruslar arasında reytinqini itirəcək. O zaman Kreml sahibi vəziyyəti düzəltmək və hər hansı bir “uğur” nümayiş etdirmək üçün Avropada böyük müharibəyə başlamalı olacaq.
“AzPolitika” xəbər verir ki, Zelenski jurnalistlərlə görüşü zamanı Rusiyada genişmiqyaslı səfərbərliyin olub-olmayacağı barədə sualı cavablandırıb: “Onların səfərbərliyi niyə dayandırdıqlarını xatırlayın. Həmin vaxt Putin öz reytinqini itirməyə başladı. Səfərbərlik Rusiya Federasiyasının liderinin reytinqini itirməsi deməkdir. Onun bunu etməməsinin yeganə səbəbi budur. İnanın ki, onlar müqaviləli döyüşçülər üçün böyük pul ödəmək istəmirdilər. Necə ki, bu illərdə böyük pullar ödəyirlər. Amma onlar buna getdilər. Təsəvvür edin ki, onun şəxsi reytinqini qorumağın qiyməti neçəyədir. Ona görə də, səfərbərlik olsa, bu, Avropa üçün çağırış olacaq. O, böyük bir müharibəyə başlayacaq”.
Zelenski böyük müharibə riskini bu cür izah edib: “Çünki ona hansısa uğuru satmaq lazımdır. Ukraynaya qarşı müharibədə o, artıq bacardığı hər şeyi “satıb” və göründüyü kimi, satdığı “məhsul” keyfiyyətsizdir. O, hazırda Ukraynaya qarşı müharibədə guya nəyəsə nail ola biləcəyi ilə bağlı yalan satır. Bəs onun uğurları harada daha sürətli ola bilər? Avropanın xəritəsinə baxın. Səfərbərlik etsə, harda sürətli uğur mümkündürsə, ora da gedəcək. Bu, dəqiqdir. Yoxsa, milyonları səfərbər etmək nəyə lazımdır? Putinin dünya müharibəsinə getməsinə dair real risklər var”.
Eyni zamanda, Ukrayna Prezidentinin sözlərinə görə, avropalıların, ABŞ-nin təşəbbüsü və Prezident Donald Trampın Putini danışıqlar masasına oturtmaq barədə siqnalları mühümdür: “Çünki bu, onu dayandıra və hərbi əməliyyatların genişlənməsi riskini azalda bilər”.
Ukrayna Prezidenti hesab edir ki, Putin şəxsən atəşkəsdən qorxur, çünki atəşkəsdən müharibəyə qayıtmaq onun üçün çətin olacaq: “Genişmiqyaslı müharibədən atəşkəsə keçmək və sonra yenidən genişmiqyaslı müharibəyə başlamaq onlar üçün asan deyil. İqtisadi cəhətdən çətindir, cəmiyyətlə, dünya ilə çətindir. Və hələ də onun əlini sıxan ölkələrlə münasibətdə bu, əlbəttə ki, çətindir. Buna görə də amerikalılar üçün onu real danışıqlara məcbur etmək çox çətindir. Odur ki, Putin hazırda müharibəni seçir. Amma bunu dayandırmaq mümkündür. Rusiyaya daha çox təzyiq göstərməliyik. Bizim uzaq məsafədən zərbələrimiz, güclü sanksiyalar, döyüş meydanında dayanmaq, özümüzü müdafiə etmək, təbii ki, bununla yanaşı, sülh təşəbbüslərini dəstəkləmək… Bunlar düzgün addımlardır və bu, işə yarayacaq”
C.Məmmədli
“AzPolitika.info”
