Azərbaycanla Avropa Şurası Parlament Assambleyası arasında davam edən gərginlik səbəbindən ölkəmiz iki ilə yaxındır ki, Avropa İnsan Hüquqları Məhkəməsinin qərarlarının icrasını dayandırıb.
Amma buna baxmayaraq, hökumət Avropa Şurasının özü və digər strukturları ilə əməkdaşlıq edir.
Məsələn 1 ay əvvəl qurumun İşgəncələr Əleyhinə Komitəsi Azərbaycana buraxıldı.
Bundan başqa ötən həftə Azərbaycan XİN və Ədliyyə Nazirliyinin əməkdaşlarından ibarət nümayəndə heyəti Avropa Şurasının Yerli və Regional Hakimiyyətlər Konqresinin iclasında iştirak edib.
Maraqlıdır ki, AŞ PA ilə gərginlik yaşayan Azərbaycan nədən Avropa Şurasının digər strukturları ilə əməkdaşlıq edir, amma Avropa İnsan Hüquqları Məhkəməsinin qərarlarını icra etmir?
Azərbaycanın AŞ PA-dakı deputat qrupunun rəhbəri olmuş Səməd Seyidov bu sualı Gununsesi.info-ya belə şərh edib: “Çünki, bunun üçün ciddi səbəbimiz var. Bu da ondan ibarətdir ki, Avropa İnsan Hüquqları Məhkəməsinin hakimlərini AŞ PA seçir. Azərbaycan da AŞ PA yoxdur. Biz nə üçün səs vermədiyimiz hakimlərin qərarlarını icra etməliyik? Bu bizim üçün ciddi səbəbdir. Mövqeyimizdə də qətiyik”.
Onu da qeyd edək ki, Avropa Məhkəməsinin qərarlarına icra nəzarəti Avropa Şurasının Nazirlər Komitəsinin səlahiyyətindədir.
