“İqtisadiyyat naziri Mikayıl Cabbarovun 5 dekabr 2025-ci ildə Azərbaycan Respublikasının Ümumdünya Ticarət Təşkilatına (ÜTT) üzv olmasına hazırlıq işləri üzrə Komissiyanın növbəti iclasını keçirməsini hökumətin bu istiqamətdə konkret addımlar atmaq istəyi kimi qiymətləndirir, hökuməti təşkilata üzvlük üçün lazım olan qərarları qısa müddətdə qəbul etməyə çağırıq”. “AzPolitika” xəbər verir ki, bu barədə Ədalət, Hüquq, Demokratiya (ƏHD) Partiyasının bu gün yaydığı bəyanatda bildirilir.
“Azərbaycan bu təşkilata üzvlük üçün 1997-ci ildə müraciət etsə də, sonrakı illərdə zəruri olan qərarları qəbul etməyib. Azərbaycanın iqtisadi göstəricilərini ÜTT-yə üzv olan qonşu Türkiyə, Rusiya, Ermənistan, Gürcüstan, Qazaxıstanla müqayisə edəndə, bu təşkilata üzvlüyün vacibliyi bir daha özünü qabarıq şəkildə göstərir”, – sənəddə qeyd olunur.
Bəyanatda vurğulanır ki, ÜTT-yə üzvlük ixraca və xarici bazarlara çıxış üçün daha geniş imkanların yaradılmasına, xarici investisiyaların artmasına, ölkəmizdə rəqabət mühitinin güclənməsinə və rəqabətədavamlı keyfiyyətli məhsul istehsalına, gömrük sisteminin sadələşdirilməsinə, şəffaflığın artırılmasına, monopoliya və proteksionizmin azalmasına, ÜTT-nin arbitraj müxanizmləri vasitəsilə xarici tərəfdaşlarla ticarət mübahisələrinin daha asan həllinə imkan verəcək.
ƏHD Partiyası hökuməti ÜTT-yə üzvlüyün ilk zamanlar yarada biləcəyi çətinliklərdən çəkinməməyə, iqtisadiyyatımızın sürətli inkişafı üçün bu istiqamətdə səylərini artırmağa çağırır.
ƏHD həmçinin hökuməti 2026-cı ili ölkəmizdə dövlət idarəetməsində, iqtisadiyyatda, məhkəmə-hüquq sistemində böyük islahatlar ili etməyə çağırır.
Bundan başqa bəyanatda hökumət xuliqanlıq və narkotiklərlə mübarizəyə dair qanunvericilik aktlarına yenidən baxmağa, ölkəmizdə humanizmi və milli birliyimizi gücləndirəcək geniş amnistiya aktı qəbul etməyə çağırılır.
“AzPolitika.info”
