Dekabrın 28-də Mehdiabad qəsəbəsində Cənub İdman Klubunun təşəbbüsü və təşkilatçılığı ilə qəhrəman şəhidlərimiz Rasim Rufullayev, Elşən Sultanlı, Vüqar Baloğlanov, Səyyar Ağayev, Fəyaz Masiyev, Arif Bağırov, Şahin Abdullayev və Qiyas Əzizovun xatirəsinə həsr olunmuş klublararası boks turniri keçirilmişdir. Birdəqiqəlik sükutdan və himnimiz səsləndikdən sonra startı verilən yarışda 14 klubdan 100-dən idmançı gücünü sınamışdır. Komanda hesabında 1-ci yeri tutan Cənub İdman Klubunun təsisçi və baş direktoru, respublikamızın əməkdar məşqçisi Samir Həsənovun tədbirlə bağlı fikirləri: 16 ildir bu sahədəyəm, ilk dəfə 2010-cu ildə Milli Qəhrəmanımız Mübariz İbrahimovun xatirəsinə həsr olunmuş yarış təşkil etdim. Həmin yarış böyük əks-dəda doğurdu. Söz verdim ki, belə tədbirlərin müntəzəm keçirilməsi üçün əlimdən gələni edəcəm. Bügünkü yarış da bu qəbildəndir. Əsas məqsəd gənclərimizin vətənpərvər ruhda böyüməsinə töhfə vermək, istedadlı uşaqlarımızın üzə çıxmasına yardım etmək, onların idmana olan
marağını daha da artırmaqdır. Çox sağ olsun Yaşar müəllimi, xeyirxah iş adamı olaraq bu cəhətdən həmişə klubumuza dəstək olub”.
Cənub Klubunun vitse-prezidenti Yaşar Ağaməmmədov yarışla bağlı belə söylədi: ” Şəhidlərimiz hamımız üçün əzizdir, müqəddəsdir. Onların qəhrəmanlığı Azərbaycanımızı bütövləşdirdi, millət-xalq olaraq başımızı uca etdilər. Azərbaycan adı dünyanın bütün qitələrində, bölgələrində fəxrlə səsləndi, bu adın qarşısında kainat baş əydi. Onların xatirəsini uca tutmaq, daim xatırlamaq bizim əbədi borcumuzdur.”
Tədbirdə, eyni zamanda, şəhidlərimizin valideynləri, onların ailə üzvləri də iştirak etmişdir. Şəhid Rasim Rufullayevin atası Yadigar Rufullayev, Elşən Sultanlının atası Nazim Sultanov, Arif Bağırovun əzizi Vasif Bağırov tədbirlə bağlı çıxış edərək təşkilatçılara minnətdarlıq etmiş, şəhidlərimizin xatirəsinə həsr olunmuş belə yarışların tez-tez baş tutmasını arzu etmişlər.
Döyüşlər başa çatdıqdan sonra şəhidlərimizin yaxınları qalibləri mükafatlandırmış, onlara fəxri fərman və diplomlar təqdim etmişlər.
