Amerika Birləşmiş Ştatlarının aparıcı media qurumlarından biri gözlənilməz coğrafi səhvə yol verib. Musavat.com-un xəbərinə görə, nüfuzlu “Vaşinqton post” nəşrində vitse-prezident Ceyms Devid Vensin Azərbaycana və Ermənistana səfəri ilə bağlı dərc olunmuş məqalədə Cənubi Qafqaz “Rusiya” adlandırılıb. Yazıda deyilir ki, “Rusiyanın Cənubi Qafqazına iki günlük səfəri zamanı vitse-prezident TRIPP-in Ermənistandan keçəcək, Azərbaycanı Türkiyə ilə birləşdirəcək, Rusiya və İranı keçəcək 42 kilometrlik nəqliyyat qovşağı yaratmaq planları barədə həvəslə danışıb”.
Daha sonra nəşrin sosial media səhifəsində səhvi düzəldən yeni bir paylaşım olub. Qeyd olunur ki, bu, qəzetin işçilərinin üçdə birini ixtisar etməsindən cəmi bir həftə sonra baş verən xətadır.
Xatıərladaq ki Dik Çeynidən (2008) sonra bununla ikinci dəfə idi ki, Birləşmiş Ştatların vitse-prezidenti Bakıda olurdu. Bu səfər iki ölkə arasında Strateji Tərəfdaşlıq haqqında Xartiya imzalanması ilə yadda qaldı. Sənəd geniş müddəalardan ibarətdir. Məsələn, onlardan biri odur ki, Azərbaycan Respublikası və Amerika Birləşmiş Ştatları mülki nüvə əməkdaşlığını dərinləşdirmək niyyətindədirlər. Bundan başqa, humanitar minatəmizlənmə sahəsində potensialın artırılmasında əməkdaşlıq etmək niyyətindədirlər.
Sənədin bəndlərindən biri Azərbaycan Respublikası və Amerika Birləşmiş Ştatları AI tərəfdaşlıqlarının inkişaf etdirilməsi üzrə əməkdaşlığı genişləndirmək və müvafiq hallarda, kosmik sənaye sahəsində əməkdaşlığı və Azərbaycan Respublikasında özəl sektorla əməkdaşlıq ilə AI data mərkəzlərinin inkişafı da daxil olmaqla, rəqəmsal infrastruktura sərmayə qoyuluşunu təşviq etmək niyyətindədirlər.
Emil Salamoğlu
Musavat.com
