“Pulu Ver, Küçənin Ortasında Bina Tik”
Sakinlərlə söhbət edirik, hamısının dərdi eynidir. Taleh Qaraşovun dönəmində Lənkəranda “inkişaf” dedikdə ancaq tikilən binalar nəzərdə tutulur. Şəhərin mərkəzi küçələrində, bir-iki mərtəbəli həyət evlərinin arasında göbələk kimi bitən 3-4 mərtəbəli binalar hər kəsi cana yığıb. Pulu olan gəlir, iki qonşunun həyətini alır, yerində bina ucaldır. Nəticə? Yeni binanın pəncərələri qonşunun birbaşa həyətinə açılır. Nə etik qayda qalıb, nə memarlıq norması. “Pulu ver, işini gör” — Qaraşovun Lənkəranda tətbiq etdiyi əsas qanun budur.
Şəhərin səki problemi
Lənkəranın onsuz da dar olan küçələri indi daha da keçilməz olub. İcra başçısı iş adamlarına elə geniş “imkanlar” yaradıb ki, obyektlər səkinin 1-1.5 metrini zəbt edib. Piyadalar maşın yoluna çıxmağa məcburdur. Abadlıq adı altında sökülən səkilər isə bərbad vəziyyətdədir. Son 15 ildə “dişə dəyəsi” bir dənə də olsun ciddi sosial layihə həyata keçirilməyib.
Lənkəranın tarixində görünməmiş rüsvayçılıq:
Şəhərin mərkəzi parklarında — Həzi Aslanov və Xocalı parkında inəklər cövlan edir. Yerli sakinlər bildirirlər ki, əvvəllər belə hallar müşahidə olunmurdu, lakin son illərdə park və yaşıllıq zonalarında mal-qara ilə rastlaşmaq mümkündür.
Onların sözlərinə görə, bəzi hallarda icra hakimiyyətinin binasının qarşısında mal-heyvanın yaxınlaşmaması üçün xüsusi nəzarət də təşkil edilir. Sakinlər isə sual edirlər: əgər inzibati binanın qarşısı qorunursa, bəs şəhərin digər ərazilərinə nəzarət niyə təmin olunmur?
Prezident İlham Əliyevin böyük ümidlərlə açılışını etdiyi bir-sra obyektlər isə demək olar işləmir. Xalçaçılıq fabriki, konserv zavodu kimi nəhəng obyektlər isə sadəcə “ölü zona”ya çevrilib.
2016-cı ildə medianın ifşa etdiyi faktlar hələ də yaddaşlardadır. Aylıq maaşı 1000-2000 manat olan bir məmurun 11 nəfər ailə üzvü ilə Çexiyada 251 min dollarlıq (təxminən yarım milyon manatdan çox) otel xərci çəkməsi hansı məntiqlə izah oluna bilər? Karlovı Varıda sutkası 2000 dollarlıq otaqlarda 21 gün qalan başçının bu pulları hansı “maaşla” yığdığı hamıya gün kimi aydındır.
Lənkəranlılar artıq yorulub. Taleh Qaraşovun 15 illik rəhbərlik etdiyi dövr sakinlər tərəfindən belə xarakterizə olunur: dağılmış infrastruktur, korrupsiya bataqlığına batmış idarəçilik və üfunət saçan küçələr. Ümid edirik ki, dövlət rəhbərliyi bu 15 illik “fəlakət dövrü”nün hesabını soracaq.
Elmidar Əliyev
Tendensiya.com
