Azərbaycan ilk və son ünvanımızdır, doğulduğumuz və əbədi olaraq bağlı qaldığımız torpaqdır. Dövlət isə arxamız, həyatımızın dayağı və təhlükəsizliyimizin təminatçısıdır. Vətəni sevməyi bizə beşik başında öyrədiblər. Beşiyimiz Vətən nəğmələri ilə yırğalanıb. Vətən sevgisi həyatımızın ilk dərsi olub. Onu qorumağın, lazım gəldikdə uğrunda can verməyin ən böyük şərəf olduğu təlqin edilib. Bu baxımdan Prezidentin köməkçisinin Almaniyada anti-Azərbaycan qüvvələrinə ünvanladığı qətiyyətli və prinsipial mesaj dövlətçilik mövqeyinin ifadəsi kimi xüsusi əhəmiyyət daşıdı. Azərbaycan dövlətinin milli maraqlarına qarşı yönələn hər hansı fəaliyyətə münasibət açıq və birmənalıdır.
Xalqın içindən çıxıb öz xalqına və dövlətinə xəyanət gözü ilə baxanlar satılmış, miskin və aciz insanlardır. Onlar nəinki Vətən sevgisini, hətta ən ali insani dəyərləri də itirmiş adamlardır. Belələri üçün nə milli mənsubiyyətin, nə də mənəvi borcun hər hansı əhəmiyyəti yoxdur. Tarix isə öz xalqına və dövlətinə arxa çevirənləri heç vaxt bağışlamır. Eləcə də Prezidentin köməkçisi Azərbaycan əleyhinə fəaliyyət göstərən dairələrin əsl simasını dəqiq və əsaslandırılmış çıxışı ilə ifşa edərək onların bütün iddialarını darmadağın etdi. Onsuz da xalqın gözündə çoxdan dəyərini itirmiş bu miskin və satılmış çevrələr bir daha öz aciz durumlarını nümayiş etdirdilər.
Ölkəmizə böhtan atanlara himayədarlıq edənlər anlamaq istəmirlər ki, Azərbaycan xalqı bu gün öz böyük lideri ilə birlikdə güclü, qürurlu və xoşbəxtdir. Xalqla dövlət arasında möhkəm birlik mövcuddur. Bu birliyi nə yalan kampaniyaları, nə də xaricdən idarə olunan anti-Azərbaycan təbliğatı sarsıda bilər. Azərbaycan xalqı öz dövlətinin yanında dayanmağın ən böyük vətəndaşlıq borcu olduğunu yaxşı bilir və bu mövqeyindən heç vaxt geri çəkilməyəcək! Xəyanəti peşə seçənlərin aqibəti isə hər zaman eyni olub, xalqın nifrəti və tarixin hökmü. Növbəti dəfə Azərbaycan xalqı Almaniyada satılmış vicdanların rəzil aqibətinin ifşasına şahidlik etdi.
Rəşad Mahmudov,
YAP İdarə Heyətinin üzvü
