Azərbaycanın Prezident Administrasiyasının sabiq rəhbəri Ramiz Mehdiyev və keçmiş MTN şefi Eldar Mahmudovun vəzifədə olduqları dönəmdə müxtəlif dövlət qurumlarına çoxlu sayda kadrlar yerləşdirdiyi, bu kadrların bəzilərinin hələ də iş başında olduğu ilə bağlı ölkə mediasında zaman-zaman çoxsaylı məlumatlar yer alıb. Bu məlumatların təhlili göstərir ki, vəzifədə olduqları dönəmdə öz yaxın çevrələrini fərqli qurumlara yerləşdirən bu şəxslər, bu yolla yerlərdəki vəziyyətə daha çevik şəkildə nəzarət edir, öz istək və arzularını daha effektiv şəkildə reallaşdıra biliblər. Məhz buna görə də həmin kadrların kariyera pilləsində sürətlə yüksəlməsinə təkan vermiş, onları daim diqqət mərkəzində saxlamışdır.
Maraqlı və bir o qədər də təəssüf doğuran məqamlardan biri dədövlət qurumlarının Ramiz Mehdiyev və Eldar Mahmudova məxsus kadrlardan təmizlənməsi prosesinin ləngiməsi, bu istiqamətdə ciddi addımların atılmamasıdır. Halbuki, Azərbaycanın dövlətçilik maraqları bu qurumların Ramiz Mehdiyev və Eldar Mahmudov yetirmələrindən təmizlənməsini zəruri edir. Dövlətçilik maraqlarımız tələb edir ki, nəinki dövlət qurumlarında, hətta qeyri-dövlət təşkilatlarında çalışan şəxslər də hər bir fəaliyyətlərində şəxsi ambisiya və qrup maraqlarını deyil, milli maraqları rəhbər tutsunlar.
Bundan başqa, Ramiz Mehdiyev və Eldar Mahmudovla bağlı baş verən proseslər onu deməyə əsas verir ki, bu şəxslərin müxtəlif vəzifələrə yerləşdirdiyi kadrlar milli maraqlarımız, dövlətçilik maraqlarımız baxımından ciddi təhlükə mənbəyidir. Buna görə də həmin şəxslərlə bağlı ciddi və miqyaslı araşdırmalar aparılmalı, Ramiz Mehdiyev və Eldar Mahmudovla bağlantıları sübuta yetirilən bu kadrlar dərhal tutduqları vəzifədən azad edilməlidir. Əks halda, bu şəxslər dövlətçilik maraqlarımız üçün ciddi təhlükə mənbəyi olmaqda davam edəcəklər.
