Ədalət, Hüquq, Demokratiya (ƏHD) Partiyasının sədri, millət vəkili Qüdrət Həsənquliyev Elchi.az-ın suallarını cavablandırıb.
Cumhuriyyet.az həmin müsahibəni təqdim edir:
-Qüdrət bəy, 15 avqustda Trampla Putin arasında Ukraynanın taleyini həll edəcək danışıqlar olacaq. Gözləntiləriniz nədən ibarətdir?
-Orada danışıqlar yox, Ukraynanı kapitulyasiya aktına necə imza etdirmək barədə fikir mübadiləsi, məsləhətləşmələr olacaq. Trampa öz partiyasından Rusiyaya sanksiyalar tətbiq edilməsi istiqamətində ciddi təzyiqlər var. Bu danışıqlar Trampı təzyiqlərdən, Rusiyanı sanksiyalardan qorumağa, Putinə isə Rusiyanın özününkü elan etdiyi Ukraynanın 4 regionunu tam işğal etməyə kömək etməyə hesablanıb.
-Müharibənin uzanması Rusiyanın xeyrinədirmi? Axı, hamı Rusiya iqtisadiyyatının çöküşündən danışır.
-Hal-hazırda müharibənin davam etməsi Rusiyaya yeni ərazilər işğal etməyə imkan verir. Rusiyanın hələ bir müddət də müharibəni davam etdirmək imkanı var. Müttəfiqləri də əsgər göndərməklə belə ciddi kömək edirlər. Ukraynanın müttəfiqləri isə cəsarətsizdilər və ciddi kömək göstərməyə hazır deyillər. Bunu görən Ukrayna ordusu hər keçən gün daha çox demoralizasiya olur. Keçən il 100.000 (yüz min) əsgərə fərariliyə görə cinayət işi açılmışdıssa, bu ilin səkkiz ayında bu rəqəm 107 minə çatıb. Daha vətənpərvərlər və cəsurlar müharibənin ilk illərində həlak olub. Ruslar o torpaqları tutmaqda daha istəkli görünür, nəinki ukraynalılar onu qorumaqda. Ukraynalılar partizan müharibəsindən geniş istifadə etmirlər. Kiçik qruplarla düşmən arxasında nadir hallarda hərbi əməliyyatlar keçirirlər, düşmənin səfərbər olmasına imkan verməmək üçün intensiv əks hücumlar təşkil etmirlər. Onlar daha çox müdafiədə, səngərlərdə hava zərbələrindən itki verirlər. Bunu Rusiya görür və ona görə müharibəni dayandırmaq istəmir. Həm də Rusiya görür ki, Ukraynanın ərazi bütövlüyünə görə üzərinə Budapeşt memorandumunu imzalamaqla öhdəlik götürmüş super güclər bu gün Ukraynanı ərazi güzəştlərinə məcbur edir, hamı işğalla barışıb.
– Belə vəziyyətdə Ukrayna nə edə bilər?
-İlham Əliyev onlara nə etmək lazım olduğunu dedi. Mövcud şəraitdə ərazilərindən imtina etmədən atəşkəsə nail olmaq. Bu, Ukrayna üçün ən uğurlu yoldur. Ukraynalılar bilməlidirlər və yəqin ki, bilirlər, ABŞ-nin ciddi dəstəyi olmasa onlar müharibədə uğur qazana bilməz. Tramp isə heç bir halda onlara ciddi dəstək verməyəcək. Onlar atəşkəsə nail olub gözləməlidirlər.
-Tramp Nobel sülh mükafatı almaq üçün müvəqqəti atəşkəsə nail ola bilərmi?
-Bu məsələni də yəqin ki, müzakirə edəcəklər. Hətta buna gediləcəyi halda, bu, Ukraynanı geniş anlamda xilas etməyəcək. Həmişə demişəm ki, Ukraynanı Amerika xalqı xilas edə bilər. Onları Avropa liderləri, xüsusilə Britaniya , Almaniya və Fransa açıq çağırışları ilə hərəkətə gətirə bilər. Amma onlar nəinki Trampı görəndə, hətta onun adını eşidəndə həyəcan keçirirlər, ona görə qorxularından bunu etməzlər. Heç Trampın qorxusundan Ukraynaya ciddi yardım da edə bilmirlər.
