Bu il Bakıda keçirilən VIII Dünya Robot Olimpiadası (WRO) üzrə yüksək nəticələr göstərən komandaların diskvalifikasiyası valideynlər tərəfindən etirazla qarşılanıb. “AzPolitika” xəbər verir ki, onlar Gənclər və İdman Nazirliyinə, Birinci vitse-prezidentinin Katibliyinin rəisi Altay Həsənova, İnnovasiyalar və Rəqəmsal İnkişaf Agentliyinin sədri Fərid Osmanova, Baş Prokuror yanında Korrupsiyaya qarşı Mübarizə Baş İdarəsinə, Elm və Təhsil Nazirliyinə və Azərbaycan Respublikasının İnsan Hüquqları üzrə Müvəkkilinə (Ombudsman) müraciət edərək övladlarının hüquqlarının bərpası və ədalətin təmin edilməsi üçün kömək tələb ediblər.
Valideynlərin təqdim etdiyi məlumata görə, övladlarını mart-aprel aylarında qeydiyyatdan keçirərək 5 aylıq hazırlığa başlayıblar. 26-28 sentyabr tarixlərində Milli Gimnastika Arenasında keçirilən ölkə seçim yarışlarında komandalar yüksək nəticələr göstərib. Yarışın ilk günü robotlar karantinə alınıb və test mərhələsi keçirilib. 27 sentyabrda əsas raundlar baş tutub və komandalar hər iki raundda yüksək xal toplayıblar. Sonra robotlar yenidən karantinə alınıb, foto və videolar çəkilib.
Valideynlər bildirirlər ki, beynəlxalq qaydalara uyğun olaraq sürpriz raund keçirilib. Bu raundda komandalar mentor dəstəyi olmadan, əvvəlcədən elementlərin yerlərini bilmədən 1 saat ərzində tapşırıqları fərdi şəkildə yerinə yetiriblər və yüksək nəticələr göstəriblər. Yarışın üçüncü günü keçirilən mükafatlandırma mərasimində komandalarımızın bəziləri səhnəyə çıxaraq sertifikat və medallarla təltif olunub. Lakin rəqibləri arasında ən yüksək nəticə göstərən bəzi komandalar xəbərsiz şəkildə diskvalifikasiya olunub.
Müraciətdə vurğulanır ki, diskvalifikasiyanın səbəbi kimi robotların plagiat hesab edilməsi göstərilsə də, bu iddia əsassızdır. Valideynlər iddia edirlər ki, robotlar karantin müddətində hakimlər tərəfindən yoxlanılıb və foto və videoları çəkilib. Bundan əlavə, komandalar sürpriz raundu yüksək nəticə ilə tamamlayıblar və bu raund iştirakçıların bilik və bacarıqlarını əyani surətdə yoxlamaq üçün təşkil olunub.
Yarışdan iki gün sonra Azərbaycan WRO komitəsi qalib komandadakı şagirdlərin valideynləri ilə görüşərək komandaların diskvalifikasiya edildiyini bildirib. Valideynlərin tələbi ilə Rəhman Rəsulzadə bu iddiaları əsaslandırmaqdan imtina edib, sübut təqdim etməyib və rəsmi olmayan bəhanələr göstərib. Valideynlər eyni zamanda qeyd edirlər ki, Rəhman Rəsulzadə onları qanunsuz ərizələrə imza atmağa məcbur etməyə çalışıb. Valideynlər bildirirlər ki, son 5 ildə Bakıda keçirilən WRO-da bu cür qayda pozuntuları dəfələrlə təkrarlanıb. Sosial mediada və müxtəlif platformalarda Kənan Kərimov və Rəhman Rəsulzadənin özbaşınalıqları dəfələrlə qeyd edilsə də, barələrində tədbir görülməyib. Müraciətdə iddia edilir ki, Kənan Kərimov nazirlikdə tutduğu vəzifədən sui-istifadə edərək olimpiadanı şəxsi kommersiya maraqlarına xidmət edən bir mexanizmə çevirib. Rəhbərlik etdiyi yarışda Rəhman Rəsulzadə ilə birlikdə öz övladları və yaxınlarının övladları, eləcə də təhsil biznesi (AREA) komandalarını müxtəlif bəhanələrlə üstünlük aldırır.
Valideynlər həmçinin bildirirlər ki, Rəhman Rəsulzadə yarışın son günü və 1 oktyabrda keçirilən toplantıda bəzi valideynləri şəxsən hədələyib, onlara psixoloji təzyiq göstərib. Valideynlər video çəkilişinə icazə verilməməsini və valideynlərin qanunsuz ərizələrə imza atmağa təhrik olunmasını bu təzyiqlərin sübutu kimi göstərirlər. Müraciətdə vurğulanır ki, bu hal uşaqların psixoloji vəziyyətinə ciddi mənfi təsir göstərib. Valideynlər ölkəmizin nüfuzuna xələl gətirən bu qanunsuz və özbaşına hərəkətlərin araşdırılmasını, məsul şəxslərin qanunvericiliyə uyğun tədbirlər görməsini və övladlarının Sinqapurda keçiriləcək Dünya Robot Olimpiadasında iştirakını təmin etməyi tələb edirlər.
Qalib komandalar və mentorlar:
RoboMission Senior – URA (I yer): mentor Süleymanov Tural Valeh oğlu; valideynlər: Əliyev Ramal Mehdi oğlu, Ağayarlı Aydın Rasim oğlu, Qasımzadə Uğur Vüqar oğlu.
RoboMission Junior – Punisher (I yer): mentor Cəfərov Rəşad Polad oğlu; valideynlər: Sultanlı Ömər Cavid oğlu, Turan Səfərli Hüseyn qızı, Namaz Safiya Ramin qızı.
RoboMission Elementary – PROcket (II yer): mentor Abdullayev Seymur Teymuraz oğlu; valideynlər: Abdullazadə Kərəm Seymur oğlu, Əliyev Kənan Elxan oğlu, Mirzə Onur Elvin oğlu.
RoboMission Elementary – ProElementary (I yer): mentor Süleymanova Ləman Amil qızı; valideynlər: Şirinzadə Hüseyn Anar oğlu, Qasımzadə Elmira Aynur qızı, Bağırov Yusif Elnur qızı.
Müraciətin sonunda valideynlər qalib komandaların nəticələrinin bərpasını və övladların Sinqapurda keçiriləcək Dünya Robot Olimpiadasında iştirakının təmin olunmasını, Gənclər və İdman Nazirliyinin sektor müdiri Kənan Kərimov və AREA rəhbəri Rəhman Rəsulzadə barəsində qanunvericiliyə uyğun tədbirlərin görülməsini, uşaqlara qarşı psixoloji təzyiq və nəticələrin əsassız ləğv edilməsi hallarının tam araşdırılmasını xahiş edirlər.
Valideynlər həmçinin qeyd edirlər ki, mövcud vəziyyət yalnız WRO-nun gedişində deyil, son 5 ildə də davam edib və ölkənin bu sahədə nüfuzuna mənfi təsir göstərir. Müraciətçilər bildirirlər ki, qısa müddət ərzində bu şikayətlərin araşdırılması və uşaqların haqlarının bərpası zəruridir.
Rasim Əliyev
“AzPolitika.info”
