Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi altında şanlı Azərbaycan Ordusu 5 il əvvəl döyüş meydanında tarixi qələbə qazandı. 2020-ci ilin 27 sentyabrında başlayan və 44 gün davam edən Vətən müharibəsində torpaqlarımızı 30 ilə yaxın işğal altında saxlayan düşmən döyüş meydanında Azərbaycan Ordusunun gücünü, qüdrətini gördü. Hərbçilərimiz, əsgərlərimiz göstərdikləri şücaətlə, qəhrəmanlıqla bütün dünyaya sübut etdilər ki, Azərbaycanın güclü ordusu var. 44 günlük müharibədə döyüş meydanında misilsiz igidlik nümunələri göstərən qəhrəman Vətən oğulları Müzəffər Ali Baş Komandanın rəhbərliyi altında şəhidlərimizin qisasını alaraq onların qanını yerdə qoymadılar. 2023-cü il sentyabrın 19-20-də Azərbaycan Ordusunun Qarabağda keçirdiyi lokal xarakterli antiterror tədbirləri zamanı qanları ilə tarix yazan qəhrəman oğullarımızın sayəsində Xankəndi və Xocalı şəhəri separatçılardan təmizləndi, Azərbaycan dövləti suverenliyini tam bərpa etdi. Bu gün doğma Qarabağda, Şuşada, Xankəndidə, Xocalıda, işğaldan azad olunmuş digər torpaqlarımızda üçrəngli Azərbaycan Bayrağı dalğalanır. Bu gün qalib Azərbaycan xalqı işğaldan azad olunmuş şəhərlərin azad olunduğu tarixləri xüsusi gün olaraq qürurla qeyd edir. Artıq xalqımız ölkə başçısının müvafiq sərəncamlarına əsasən hər il sentyabrın 20-sini Azərbaycan Respublikasında Dövlət Suverenliyi Günü, Xankəndi, Xocalı, Xocavənd və Ağdərə şəhərləri günü kimi də qeyd edəcəklər. Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi altında rəşadətli ordumuzun bəxş etdiyi bu möhtəşəm Qələbənin sevincini hər bir azərbaycanlı bu gün də böyük qürur hissi ilə yaşayır. Qazandığımız bütün bu tarixi nailiyyətlərə görə Ali Baş Komandana, onun rəhbərliyi altında bizləri Qələbə ilə sevindirən Azərbaycan Ordusunun əsgər və zabitlərinə, hərbçilərimizə, Vətən uğrunda canından keçən qeyrətli, cəsur oğullarımıza, şəhidlərimizə, qazilərimizə bir ömür boyu minnətdar olacağıq.
Bəli, bu gün qürurla deyə bilirik ki, qazandığımız bütün Qələbələr şəhidlərimizin qanı, canı, qazilərimizin sağlamlığı bahasına əldə edildi. Şanlı Zəfəri bizlərə bəxş edən şəhidlərimizin ailələrinə, yaralı döyüşçülərə, müharibə əlillərinə, iştirakçılarına qayğı göstərmək vətəndaş olaraq hər birimizin ən ümdə işi olmalıdır. Hər an torpaqlarımızın düşmən tapdağından azad olunmasında canını fəda edən əsgər və zabitlərimizə, hərbçilərimizə minnətdar olmalı, qanları ilə dastan yazan şəhidlərimizin ruhları qarşısında baş əyməliyik. Vətən naminə döyüşən və yaralanan qazilərimizlə, canlarından keçən şəhidlərimizlə hər zaman qürur duymalı, onları tanımalı və tanıtmalıyıq.
Ölkə Prezidenti İlham Əliyevin və Birinci vitse-prezident Mehriban xanım Əliyevanın şəhidlərimizin ailələrinə, Qarabağ müharibəsi əlillərinə, onların ailələrinə göstərdikləri dövlət qayğısı Qazax rayonunda da hər zaman yüksək səviyyədə hiss olunur, bu qayğı görülən işlərdə, həyata keçirilən tədbirlərdə öz real əksini tapır.
Rəhbər təyin olunduğu ilk gündən şəhidlərimizin xatirəsini əziz tutan, onların ailə üzvlərinə, hərbçilərimizə, qazilərimizə, yaralı əsgər və zabitlərimizə daim qayğı ilə yanaşan rayon rəhbərliyi bu gün də öz ənənəsinə sadiq qalaraq xeyirxah əməlini davam etdirir. Hər zaman şəhid ailələrinin, qazilərimizin yanında olaraq onlardan qayğısını əsirgəmir.
Qazax Rayon İcra Hakimiyyətinin başçısı Rəcəb Babaşov 2-ci dərəcəli Vətən müharibəsi əlili, Respublika Prezidentinin müvafiq sərəncamları ilə “Füzulinin azad olunmasına görə”, “Hərbi xidmətlərə görə”, “Cəsur döyüşçü”, eləcə də “Vətən müharibəsi iştirakçısı” medalları ilə təltif edilmiş Adıgözəlov Vüsal Bəşir oğlunu da daim diqqətdə saxlayır, onun səhhəti, qayğıları ilə maraqlanır. İcra başçısının bu gün qazimizlə birlikdə Bakı şəhərində xəstəxanada olması, onun səhhəti ilə bağlı həkimlərin fikrini öyrənməsi, müalicəsini Qazax Rayon İcra Hakimiyyəti olaraq öz üzərinə götürməsi həmin qayğının bariz nümunəsidir.
Qazimiz Vüsal Adıgözəlov hər zaman şəhid ailələrinə, qazilərə göstərilən diqqətə, qayğıya görə ölkə Prezidenti İlham Əliyevə, Birinci vitse-prezident Mehriban xanım Əliyevaya minnətdarlığını bildirir. Daim onun qayğıları ilə maraqlanan rayon rəhbərliyinə razılığını ifadə edir.
Məlumat üçün qeyd edək ki, Adıgözəlov Vüsal Bəşir oğlu 20 dekabr 1989-cu ildə Qazax rayonunun Bağanıs Ayrım kəndində anadan olub. Qazax rayon İslam Nəsibov adına Aşağı Əskipara kənd tam orta ümumtəhsil məktəbi bitirib. Orta təhsillidir. 2014-cü ilin avqust ayından N saylı hərbi hissədə xidmətə müddətdən artıq həqiqi hərbi xidmət hərbi qulluqçusu (MAHHXHQ) olaraq başlamışdır. 10 oktyabr 2020-ci il tarixdə Füzuli-Xocavənd istiqamətində gedən döyüşlərdə iştirak etmiş və 17 oktyabr 2020-ci il tarixdə Füzuli rayonu ətrafında gedən döyüşlərdə ayağından 1, qarından 7, beldən 3, sağ qol bazudan 3 qəlpə yarası almışdır. 17.10.2020-ci il tarixdə Füzuli rayonunda ilkin tibbi yardım göstərilmiş və iki dəfə əməliyyat olunmuşdur, vəziyyəti pisləşdiyi üçün Bakı Şəhər Hərbi Hospitala aparılmış 1 gün orda müalicə olunmuşdur. Səhhəti ilə əlaqədar 19.10.2020-ci il tarixdən Bakı Sağlamlıq Mərkəzində müalicəsini davam etdirmiş və iki dəfə əməliyyat olunmuşdur. 24.12.2020-ci il tarixdən Qazaxa gəlmişdir. Hərbi hissədən tərxis olub. 14.07.2021-ci il tarixdə II qrup əlillik dərəcəsi təyin edilmişdir. 2023-cü ildə bağırsağından, 2024-cü ildə sol ayağından, 2025-ci ildə sol ayağının dizdən aşağı hissəsindən əməliyyat olunmuşdur. Qazimizə 16.12.2023-cü il tarixdə Əmək və Əhalinin Sosial Müdafiəsi Nazirliyi tərəfindən “Xəzər LADA” markalı avtomobil verilib. 2022-ci ildə Əmək və Əhalinin Sosial Müdafiəsi Nazirliyi tərəfindən Bakı şəhəri, Binəqədi rayonu Xocasən qəsəbəsində 3 otaqlı mənzillə təmin olunub. Ailəlidir, 3 övladı var. Ölkə Prezidentinin müvafiq sərəncamları ilə “Füzulinin azad olunmasına görə”, “Hərbi xidmətlərə görə”, “Cəsur döyüşçü”, eləcə də “Vətən müharibəsi iştirakçısı” medalları ilə təltif edilib.
