Anadolu Məktəbi tərəfindən təşkil olunan “Azərbaycan və Türk Ədəbiyyatı Oxumaları”nın növbəti tədbiri 4-7 oktyabr tarixlərində Beynəlxalq Maarif Məktəbləri Gənclik Mərkəzində keçirilib. “Dildə, Fikirdə, İşdə Birlik” şüarı ilə təşkil edilən proqram çərçivəsində Türk və Azərbaycan ədəbiyyatının zəngin irsi, meyar dəyərləri və ədəbiyyat dünyasına töhfə vermiş görkəmli şəxsiyyətləri müzakirə olunmuşdur.
Tədbir rəsmi açılış nitqləri ilə başlamış: qonaqlar və təşkilatçılar iki qardaş ölkə arasında ədəbi və mədəni əlaqələrin möhkəmləndirilməsinin vacibliyini vurğulamışlar. Xalq şairi Sabir Rüstəmxanlı tədbirdə çıxış edərək gənclərin bu cür ədəbi və fəlsəfi oxumalar vasitəsilə mənəvi irsimizə yiyələnmələrinin böyük əhəmiyyət daşıdığını qeyd etmiş, layihənin təşkilini yüksək qiymətləndirərək gənclərə dəyərli tövsiyələrini vermişdir. Sabir Rüstəmxanlı gənclərə imzalı kitablarını hədiyyə etmişdir.
Gülçöhrə Abbasovanın sədrliyi ilə keçirilən açılış panelində Masal Özhekim, Sevde Orhan, Fatih Emre Oğur və Tülay Balıtatlı kimi gənc panelistlər Türk və Azərbaycan ədəbi əlaqələri, birgə mədəni irs və ədəbi təhlillərə dair məruzələrlə çıxış etmişlər.
Çıxışlarda və təqdimatlarda Hacı Bəktaş Vəli və Yunus Əmrə kimi mənəviyyat dünyamızın böyük simaları anılmış, gənclərin bu xəzinə ilə tanışlığının əhəmiyyəti qeyd olunmuşdur. Yazıçı və tərcüməçi İmdat Avşar mütəxəssislərin iştirakı ilə çıxışlar qiymətləndirilmiş, proqram şagirdlərin xor çıxışları, Azərbaycan və Türkiyə bayraqları ilə bəzədilmiş təntənəli bağlanışla yekunlaşmışdır. Bu əlamətdar tədbir gənc nəsillərin köklü ədəbi irsimizi tanımasına, mədəni körpülərin güclənməsinə və iki ölkə arasındakı qardaşlıq münasibətlərinin ədəbiyyat vasitəsilə daha da dərinləşməsinə xidmət etmişdir.
