Saatlı rayon Naharlı kəndinin sakinləri illərdir bir sıra ciddi çətinliklərlə üz-üzə qaldıqlarını bildirirlər. Sakinlərin sözlərinə görə, kənddəki əsas problemlər qaz təminatı ilə bağlıdır. Belə ki, kəndin bir hissəsində qaz təminatı mövcuddur, lakin digər hissəsi hələ də qazsız yaşayır. Təxminən bir il əvvəl ərazidə başlanan qazlaşdırma işləri yarımçıq qalıb, bu da soyuq qış aylarında yerli əhali üçün böyük çətinliklər yaradır.
Naharlı kənd sakinlərir mətbuata ünvanladığı şikayətdə bildirirlər ki, kəndin bir hissəsi qazlaşdırılıb, digər hissəsinə isə qaz çəkiliçini dayandırıblar: “Dedilər, kəndimizə qaz veriləcək, sevindik. Dedik, bizim də canımız odundan, taxtadan, sobadan qurtaracaq. Proses başladı. Kəndboyu yollara gətirib material da tökdülər. Kəndarası küçələrə qaz xətti çəkildi. Evlərə qazın çəkilişi və sayğacın qoyulması üçün vətəndaşlardan pul yığıldı. Məlum səbəblərdən o zaman hamı tələb olunan məbləği verə bilmədi. Bir neçə evə qaz çəkildi və bununla dap proses dayandı. Nəticədə kəndimizin xeyli evləri yenə də qazsız qaldı. Maraqlıdır, dövlət materiala bu qədər xərc çəkib qaz xəttini evlərimizə qədər gətiribsə niyə qazımız verilimir. Axı bu qədər müddətdə qaz sərfiyyatına görə ödəcəyimiz vəsait dövlət büdcəsinə yönələcəkdi. Yəni qazlaşdırma prosesi başa çatsaydı bundan dövlət də yararlanacaqdı, vətəndaş da.”
Sakinlər bildirir ki, baş verənlərə buna etiraz olaraq kənd icra nümayəndəliyinə, Saatlı Rayon İcra Hakimiyyətinə və Şirvan Regional Qaz İstismarı İdarəsinə müraciət ediblər. Amma “Hələ bir nəticəsini görməmişik”, – deyirlər: “Bizə məlumat çatıb ki, kəndimiz qazlaşdırılmış kənd kimi rəsmiləşdirilib. Yəni faktik olaraq dövlət rəhbərliyi aldadılıb. Çünki reallıqda kəndimizdə cəmi bir neçə evə qaz çəkilib. Kəndin qalan hissəsi yenə qazsızdır. Ancaq nədənsə bunu nəzərə alıb bütün kəndin qazlaşdırıldığını deyirlər. Bizdə olan məlumata görə, belə rəsmiləşdirilib”.
Sakinlər kənddə heç zaman qaz olmadığını deyirlər: “Qışda bilmirik başımızı götürüb hara gedək. Evimizdə uşaq, yaşlı, xəstə var. Vallah, odunla bacara bilmirik. Həyətimizdə ağac da qalmayıb. 20 ildir yandırırıq. Daha yandırmağa da nəsə tapmırıq. Bilmirik bizimlə nə şəxsi qərəzlikləri var. Fikirləşirik ki, idarə kəndə ayrılan materialı almayıb, pulu cibinə qoyub. Nəticədə bir neçə ev qazlaşdırılaraq bütün kəndə aid edilib. Axı biz də bu ölkənin vətəndaşıyıq. Yoxsa bizi vətəndaş hesab etmirelər? Ağlımıza başqa heç nə gəlmir. Xahiş edirik bizə kömək edin”.
Məsələ ilə bağlı rəsmi cavabda bildiriliur ki, Azərbaycan Respublikası Prezidentinin təsdiq etdiyi müvafiq Qanunla “Qaz təchizatı haqqında” Azərbaycan Respublikasının Qanununa dəyişiklik edilib: “Qanuna əsasən tikintisinə icazə tələb olunan, lakin belə icazə alınmadan inşa edilmiş və ya tikilməkdə olan tikinti obyektlərinin qaz qurğularının qazpaylayıcı şəbəkəyə qoşulması qadağandır. Bu Qanun 2023-cü ilin oktyabr ayının 1-dən qüvvəyə minir”. Yeni Qanuna əsasən vətəndaşlar fərdi qazlaşma ilə əlaqədar müraciət etdikdə ilk növbədə fərdi yaşayış evinin və ya tikilinin tikintiyə icazə sənədinin olmasına diqqət yetirməlidilər. Amma kəndin yarısına qaz çəkilib digər yarısını prezident sərəncamı ilə izah etmək ancaq təxribatdır, çünki qazlaşdırılmış evlərin də mülkiyyət sənədi yoxdur. Ümumiyyətlə rayonlarda mülkiyyət sənədinin əldə olunması müşkülə çevrilib…
Mövzunu diqqətdə saxlayacağıq
