Prezident Administrasiyasının sabiq rəhbəri Ramiz Mehdiyevin İlham adlı kürəkəninin qoçuları Bakı və rayonlarda at oynadır. Ramiz Mehdiyevin qələminin çoxdan qırılmasına baxmayaraq, hələ də özlərini kiçik padşahlar kimi hiss edən bu şəxslər vətəndaşlara məxsus torpaq sahələrini ələ keçirməyə çalışır, öz maraqları naminə dinc sakinlərə ciddi problemlər yaradırlar. Bununla bağlı cumhuriyyet.az-a verilən məlumata görə belə qoçulardan biri – Ramiz Mehdiyevin kürəkəninə məxsus şirkətə rəhbərlik edən Vidadi adlı şəxs Bakının Nizami rayonunda “Neolit” şadlıq sarayının yaxınlığında yerləşən 4 hektarlıq ərazini və təmir sexini ələ keçirib. 4 hektarlıq torpaq sahəsini ələ keçirmək üçün həmin torpağın əsl sahibi aldadaraq sənədlərə qol çəkdirən Vidadi adlı bu şəxs, “Qamışlıq” adlanan ərazidəki təmir sexini də zorakılıqla ələ keçirib.
Bunca əraziləri qəsb etməyinə baxmayaraq, öz tamahına heç cürə “dur” deyə bilməyən Vidadi həzrətləri Abşeron rayonu Maszır qəsəbəsi Zəli gölü deyilən ərazidə, daha dəqiq desək, balıqçılıq təsərrüfatının aşağısındakı əraziləri də əslən Laçın rayonundan olan sahibinin əlindən alıb. Qobu, Hökməli, Xırdalan və s. ərazilərdə də Vidadi adlı bu şəxsin qanunsuz əməllərindən əziyyət çəkənlər yetərincədir. Artıq iş o yerə çatıb ki, Ramiz Mehdiyevin kürəkəninin qoçularının əlindən bezar olan vətəndaşlar kömək üçün dövlət başçısına müraciət etmək qərarına gəliblər. Onlar hesab edirlər ki, bəlkə bu yolla əmlaklarını geri ala, ədaləti bərpa edə bilsinlər.
Onu da qeyd edək ki, ölkə mediasında Ramiz Mehdiyevin kürəkəni və onun şirkətindəki şəxslərin qanunsuz əməlləri ilə bağlı çoxlu sayda materiallar yer alsa da, hələ ki, bununla bağlı əlaqədar qurumlar tərəfindən konkret addım atılmayıb. Vətəndaşlar ümid edir ki, aidiyyati orqanlarr gec də olsa hərəkətə gələcək və bu özbaşınalıqların qarşısını almaq üçün gərəkli adımlar atacaqlar.
