“Summer Tour Azərbaycan” MMC haqqında şikayətlərin ardı-arası kəsilmir. Son dövrlər turizm bazarında ən çox müzakirə olunan mövzulardan biri olan bu iddialar şirkətin fəaliyyətinə ciddi kölgə salır.
Tribuna.az-ın Pravda.az-a istinadən verdiyi məlumata görə, turizm şirkətləri tərəfindən göndərilən şikayətlər “Summer Tour Azərbaycan”ın müştərilərə AZAL-ın adından yalan məlumatlar verdiyini iddia edir. Bu, istehlakçıların aldadılması və rəqabət mühitinin pozulması kimi qiymətləndirilir.
İddialara göru, şirkət müştərilərə sərfəli təkliflər vəd edərək, onları cəlb edir, lakin sonradan vədlərini yerinə yetirmir və ya təklif olunan xidmətlər elan ediləndən fərqli olur. Ən narahatedici məqam isə bu fırıldaqçılıq iddialarında ölkənin milli aviadaşıyıcısı AZAL-ın adının hallanmasıdır.
Bu cür hallar yalnız “Summer Tour Azərbaycan”ın imicini deyil, həm də ümumilikdə Azərbaycanın turizm sektoruna olan etibarı sarsıdır. İstehlakçılar arasında yaranan inamsızlıq turizm bazarının sağlam inkişafına mane olur və dürüst fəaliyyət göstərən şirkətlərin də reputasiyasına zərər verir.
Məsələnin ciddiliyi nəzərə alınaraq, aidiyyəti dövlət qurumları, xüsusilə də İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən təcili araşdırma aparılması vacibdir. Müştərilərin hüquqlarının qorunması və bazarın şəffaflığının təmin edilməsi prioritet olmalıdır.
AZAL kimi nüfuzlu bir şirkətin adının bu cür iddialarda hallanması xüsusi narahatlıq doğurur. Milli aviadaşıyıcının da bu məsələyə aydınlıq gətirməsi və adının sui-istifadəsinin qarşısını almaq üçün lazımi addımları atması gözlənilir.
“Summer Tour Azərbaycan” MMC-nin bu ittihamlara cavab verməsi və yaranmış vəziyyəti şəffaflıqla izah etməsi zəruridir. Əks halda, şirkət həm hüquqi, həm də reputasiya baxımından ciddi problemlərlə üzləşə bilər.
