Ana Vətən Partiyasının növbədənkənar qurultayında baş verənlər bundan sonra ölkə siyasi səhnəsindəki proseslər fonunda kölgədə qaldı. Halbu ki, ortada ciddi fakt var idi: Azərbaycan müstəqillik tarixində demək olar ki, ilk dəfə bir partiyanın qurultayında sədr seçkisi alternativ şəkildə keçirilir və köhnə sədrin komandası seçkini uduzur. Bu videokadrlarla sübuta yetirilən bir faktdır. Ana Vətən Partiyasının sədr müavini Elçin Ağamalı qurultay nümayəndələrtinin böyük əksəriyyətinin səsini toplayaraq partiya sədri seçilir. Qurultaydan yayılan video görüntülərdən də aydın olur ki, qurultay nümayəndələrinin bir hissəsi Elçin Ağamalını partiyanın yeni sədri elan edir və onun seçildiyini təsdiqləyirlər.
“Siyasi partiyalar haqqında qanun”a uyğun olaraq Elçin Ağamalı oktyabrın 25-də keçirilmiş qalmaqallı qurultayın nəticələri ilə bağlı noyabrın 3-də Ədliyyə Nazirliyinə müraciət edib. 10 günə yaxın zaman keçməsinə baxmayaraq hələ Ədliyyə Nazirliyinin rəsmi cavab yoxdur. Amma buna qədər Fəzail Ağamalı başqa bir addım atıb. Belə ki, cumhuriyyet.az onun dəstəsindən mətbuata ötürülən məlumata istinadən bildirir ki, 05 noyabr 2025-ci ildə “Ana Vətən” Partiyasının İdarə Heyətinin iclası keçirilib və Ana Vətən Partiyasının növbədənkənar IX Qurultayında prosedur qaydalarını kobud pozmaqla Partiya üzvünün müvafiq vəzifələrini (Partiya orqanlarının qanuni qərarlarını yerinə yetirmək; Partiyanın adına, məqsəd və vəzifələrinə xələl gətirən hərəkətlərə yol verməmək) müəyyən edən “Siyasi partiyalar haqqında” Azərbaycan Respublikası Qanununun 22.2.3-cü, 22.2.6-cı maddələrinin və Partiya Nizamnaməsinin 5.5.3-cü, 5.5.6-cı bəndlərinin tələblərini pozmuş Elçin Ağamalının Partiyadan xaric edilib. 33 illik partiya sədri tərəfindən tək siyasi dözümsüzlük yox həm də təşkilati yanlışlıq qərarıdır. Çünki bir partiya Qurultaya gedirsə Qurultaya qədərki bütün qurum və orqanların səlahiyyətlərinə xitam verilmiş olur. Başqa sözlə Ana Vətən Partiyasının 5 noyabrda keçirilən İdarə Heyəti 2 səbəbdən heç bir səlahiyyətə malik deyil: Birincisi, əgər köhnə İdarə Heyətindən söhbət gedirsə yuxarıda qeyd edildiyi kimi, bu tərkib qurultayla səlahiyyətinin bitiribh. İkincisi , söhbət Qurultaydan sonra formalaşmış İdarə Heyətindən gedirsə Ədliyyə Nazirliyi hələ Qurultay qərarları ilə bağlı rəsmi qərar verməyib.
Elə həmin qeyri-legitim İdarə Heyətinin iclasında Partiya Nizamnaməsinin 5.8.1-ci, 10.3-cü və 12.3.7-ci bəndlərini əsas götürərək, 12 rayon təşkilat sədrlərinin (Paşa Alməmmədov – Ağstafa rayon təşkilatı, Telman Qasımov – Ağsu rayon təşkilatı, Orxan Əhmədov – Bərdə rayon təşkilatı, Ziya İbrahimov – Hacıqabul rayon təşkilatı, Elnur Osmanov – Kürdəmir rayon təşkilatı, Mahmud Nuriyev – Qazax rayon təşkilatı, Yaşar Tağıyev – Lənkəran rayon təşkilatı, Azad Əhmədov – Masallı rayon təşkilatı, Bayram Mustafayev – Sabunçu rayon təşkilatı, Nazim Muradəlizadə – Şabran rayon təşkilatı, Çoşğun Məmmədov – Zərdab rayon təşkilatı, Fazil Ağamalıyev – Suraxanı rayon təşkilatı) Partiyadan xaric edilməsi, həmin təşkilatların fəaliyyətinə xitam verilməsi haqqında qərar qəbul edilib. Partiyanın 12 rayon təşkilatı buraxılıb. Bu təşkilatların hər birində orta hesabla 150 partiya üzvünün olduyunu nəzərə alsaq, belə çıxır ki, 2 min üzv partiyadan kənarlaşdırılıb. Ədliyyə Nazirliyində 6 min üzvlə qeydiyyatdan keçdiyini nəzərə alsaq indiki durum partiyanın buraxılması anlamına gəlir.
Bütün bu yanlışlıqlarla Elçin Ağamalıya qarşı qəzəbi soyumayan Fəzail Ağamalı hətta Azərbaycan maraqlarında da yanlışlıqdan çəkinmir. Belə ki, Elçin Ağamalı
özünün Facebook səhifəsində qələbəmizin 5 illiyi ilə bağlı analitik yazı dərc edib və qələbənin əldə olunmasında ölkə prezidenti cənab İlham Əliyevin müstəsna rolunu önə çəkib. Ana Vətən Partiyasının sabiq sədri Fəzail Ağamalı məqaləyə “qəzəbli smayliki” qoymaqla reaksiya verib. Görəsən, yazıda göstərilən hansı fikir görəsən Fəzail müəllimin xoşuna gəlməmişdir.
