Dubaydan Sinqapura uçan “Singapore Airlines” aviaşirkətinə məxsus reysdə azərbaycanlı sərnişinə məxsus yüksək dəyərli baqajı oğurlamağa cəhd edən şəxs Sinqapur məhkəməsi tərəfindən 20 ay müddətinə azadlıqdan məhrum edilib.
Musavat.com xəbər verir ki, hadisə beynəlxalq mediada, o cümlədən “The Independent” nəşrində geniş işıqlandırılıb.
Məlumata görə, Çin vətəndaşı, 26 yaşlı Liu Minq avqustun 7-də Dubaydan Sinqapura həyata keçirilən uçuş zamanı biznes-klassda yerləşərək məqsədli şəkildə varlı sərnişinləri hədəf alıb. Prokurorluğun açıqlamasında bildirilir ki, o, reysə digər sərnişinlərin yüksək dəyərli əşyalarını oğurlamaq niyyəti ilə minib.
İstintaq materiallarına əsasən, Liu Minq azərbaycanlı kişinin oturduğu yerdən beş sıra öncə, onun həyat yoldaşının isə bir sıra önündə əyləşib. Avqustun 8-nə keçən gecə, şam yeməyindən sonra təyyarənin salonunda işıqlar zəiflədikdə, o, hərəkətə keçib. Zərərçəkən kişi yatdığı halda, həyat yoldaşı qısa mürgüdən oyanaraq Liu Minqin ərinə məxsus baqajı yuxarı rəfdən götürüb öz yerinə apardığını görüb.
Qadın dərhal təqsirləndirilən şəxsin üzərinə şığıyıb. Lakin onun cavabını anlaya bilmədiyindən təyyarə heyətinə müraciət edib. Oğurluğun ifşa olunduğunu anlayan Liu Minq baqajı geri qaytararaq əvvəlki yerinə qoyub və ekipaja çantanı səhvən öz əşyası ilə qarışdırdığını bildirib. Lakin təyyarə “Changi Airport” hava limanına endikdən sonra o, hüquq-mühafizə orqanları tərəfindən saxlanılıb.
Məhkəmə iclasında açıqlanan məlumatlar isə şok effektlidir. Məlum olub ki, azərbaycanlı sərnişinə məxsus çantada ümumi dəyəri təxminən 74 min ABŞ dollarını aşan əşyalar var imiş. Bunlara müxtəlif valyutalarda nağd pul, təxminən 1 550 dollar dəyərində “Huawei” noutbuku, 4 min dollar dəyərində 56 ədəd siqar, təxminən 26 min dollar dəyərində “Chopard” markalı saat və təxminən 38 min dollar dəyərində “Audemars Piguet” saatı daxil idi.
Zərərçəkənin həyat yoldaşının vaxtında müdaxiləsi nəticəsində heç bir əşya itirilməyib. Liu Minq məhkəmədə oğurluq maddəsi üzrə təqsirini tam etiraf edib və 20 ay müddətinə azadlıqdan məhrum olunub.
Hadisənin maraqlı tərəfi isə oğrunun hədəfində olan azərbaycanlı ailənin kimliyi və onların yalnız bir çantada bu qədər yüksək məbləğdə vəsait və dəyərli əşya daşımasıdır.
“The Independent” zərərçəkənlərin şəxsiyyətini açıqlamayıb. Bununla belə, fakt ölkə daxilində və beynəlxalq müstəvidə geniş müzakirələrə səbəb olub.
Bizə də maraqlıdır: bu qədər zəngin azərbaycanlılar kimdir və onların yalnlz birinin çantasında olan bunca vəsaiti ölkədən necə çıxarıblar?
