Məlum olduğu kimi, Azərbaycan Respublikası Gənclər və İdman Nazirliyinin Kollegiyasının 16.12.2024-cü il tarixli 35 nömrəli qərarı ilə Qazax şəhəri 2026-cı il üçün Azərbaycanın “İdman paytaxtı” elan edilib.
Təqdirəlayiq haldır ki, bu il martın 5-i təkcə Azərbaycanda Bədən Tərbiyəsi və İdman Günü kimi deyil, həm də “Qazax İdman paytaxtı 2026″nın açılış mərasimi ilə yaddaşlara yazılacaq. Bu il 5 mart tarixi qazaxlılar üçün daha da əlamətdar olacaq. Çünki həmin gün “Qazax İdman paytaxtı 2026″nın açılış mərasimi keçiriləcək. Həmin gün Qazax idman paytaxtının rəmzi açarını Qəbələdən təhvil alacaq, daha sonra “Qazax İdman paytaxtı 2026″nın maskotu ictimaiyyətə təqdim olunacaq.
5 Mart – Bədən Tərbiyəsi və İdman Günü münasibətilə Qazax şəhərində idman paradı və “İdman Paytaxtı”nın açılış mərasimi keçiriləcək.
Martın 5-də, saat 14:00-da Qazax şəhərində #İdmanhəftəsi çərçivəsində Gənclər və İdman Nazirliyi və Qazax Rayon İcra Hakimiyyətinin birgə təşkilatçılığı ilə keçiriləcək mərasimdə məşhur müğənnilər Mardan və Murad Arif çıxış edəcəklər.
Martın 4-də Qazax Rayon İcra Hakimiyyətinin və Qazax-Tovuz Regional Gənclər və İdman İdarəsinin birgə təşkilatçılığı ilə “Qazax İdman paytaxtı 2026″nın açılış mərasimi ilə əlaqədar Qazaxda səfərdə olan media nümayəndələrinin rayonun görməli yerlərinə ekskursiyası təşkil olunub.
Qazax Rayon İcra Hakimiyyətinin, Qazax-Tovuz Regional Gənclər və İdman İdarəsinin əməkdaşlarının, Qazax Rayon İcra Hakimiyyəti yanında Gənclərin Yerli Məşvərət Şurasının üzvlərinin və könüllülərin iştirakı ilə təşkil olunmuş ekskursiya zamanı media nümayəndələri Qazax rayonunun gəzməli, görməli yerlərində olublar.
Ekskursiya zamanı qonaqlara Xalq şairi Səməd Vurğunun Poeziya evi, Yuxarı Salahlı kənd İƏD üzrə nümayəndəliyinin önündə Molla Pənah Vaqifin abidəsi, 44 günlük Vətən müharibəsi şəhidlərinin xatirəsinə yaradılmış “Qarabağ Azərbaycandır!” Abidə Kompleksi, Qazax Rayon Heydər Əliyev Mərkəzi və parkı, Qazax Tarix-Diyarşünaslıq Muzeyi, Qazax Ədəbiyyat Muzeyi, Fəxri Qazaxlılar parkı, Birinci Qarabağ və Vətən müharibəsi şəhidlərinin xatirəsinə yaradılmış Şəhidlər Xiyabanı, Qazax Cümə Məscidi, Qazax Müəllimlər Seminariyası ADA Universiteti Qazax Mərkəzi, Qazax Olimpiya İdman Kompleksi haqqında dolğun, əhatəli məlumatlar verilib.
Qazax Rayon İcra Hakimiyyətinin başçısı Rəcəb Babaşov rayonumuzda səfərdə olan media nümayəndələri və digər qonaqlarla görüşüb, onlarla səmimi ürək sözlərini bölüşüb. İcra başçısı Qərbin qapısı sayılan Qazaxda qonaq olan media nümayəndələri ilə görüşməkdən məmnun olduğunu bildirib. İcra başçısı qonaqlara rayonun tarixi, keçmişi, bu günü, tarixi şəxsiyyətləri, sosial-iqtisadi göstəriciləri, kənd təsərrüfatı, istehsal və sənaye müəssisələri haqqında dolğun və əhatəli məlumat verib. Elm, təhsil, səhiyyə, mədəniyyət, idman sahəsində əldə edilən nailiyyətlərdən, qazanılan uğurlardan söz açıb. İcra başçısı Qərbin qapısı sayılan Qazax şəhərinin 2026-cı il üçün Azərbaycanın “İdman paytaxtı” seçilməsinə görə Azərbaycan Respublikası Gənclər və İdman naziri Fərid Qayıbova razılığını ifadə edib. Rayon rəhbəri Qazax şəhərinin 2026-cı il üçün Azərbaycanın “İdman paytaxtı” seçilməsinin rayonda idmanın inkişafı istiqamətində mühüm töhfə verəcəyini vurğulayıb.
